Le Ménage ès Feuvres,
St. Ouën.
Lé 28 dé juilet, 1979.
Moussieu l'Rédacteu,
Les meurtres en Jèrri, n'arrêtent pon et l'fait, si bein connu à ch't heu, qué la sentence dé mort prononcée par la Cour Rouoyale s'en va êt' réduite à la prison pour la vie par la Reine, encouothage lé malfaiteux à continnuer sa mêchanceté. Pèrsonne né s'en va m'faithe craithe qué la crainte dé la corde au co n'empêche pon l'crînme dé meurtre. Lé p'tit nombre d'meurtres en Angliétèrre dévant les deux grand' dgèrres en est la preuvre, et jusqu'à y'a tchiques années i' n'y'en avait pon ieu iun en Jèrri dépis 1907.
La chose tchi m'êtonne lé pus est qué la victînme d'un meurtre est si vite oubliéé par lé peupl'ye. Quand l'atchusé est attrapé, arrêté et présenté d'vant Justice, lé monde pathaît c'menchi à aver pitchi d'li à la pliaiche dé la victînme et d'la sympathie pour ses pathents, gens ou anmîns. Ch'est un drôle dé trait d'caractéthe qué j'n'ai janmais peut comprendre.
A m'n idée, il est grand temps dé r'mett' la peine dé mort sus l'tapis. Si l'meurtriyi 'tait seux d'aver à pâsser tout l'restant d'sa vie en prison ès travaux forchis ché s'sait p't-êt eune vraie peunnition, mais en Améthique les prisons sont oblyigis d'mett' un tas d'prisonnièrs en libèrté d'temps en temps pour faithe du run pour d'autres, et y'en a un tas tchi r'quémenchent lus vie crînminnelle eune fais sortis d'prison. Et v'la tchi m'ramémouaithe qué ch't êté i' fut mentionné dans la gâzette qué nouot' neuve prison à La Mouaie 'tait plieinne à un moment donné et qué lé temps veindrait p't-êt' tch'i' faudrait l'agrandi.
Dans cèrtaines grandes villes dé l'Améthique ch'est dangereux pour les piêtons d'marchi dans les rues la niet, et j'n'éthais janmais pensé d'vaie l'jour qué telles conditions pouôrraient arriver en Jèrri - nouot' chièr pétit Jèrri tch'était si doux et paîsibl'ye dans man janne temps - mais un tas d'anmîns en ville mé disent qué ch'est d'même à St. Hélyi d'nouos jours et tch'il' ont peux d'sorti dans les rues la niet. La police fait d'san mus, mais i' faudrait r'doublier l'nombre d'hommes dé police pour y suffithe. Et ch'est r'mèrquabl'ye qué plusieurs causes dévant la Cour dé Police Correctionnelle à ches drein nouos montrent qué l's hommes dé police mêmes sont souvent assautés. Ch'a tréjous 'té dans l'temps pâssé qué l'unniforme dé la police 'tait si respecté qué ch'tait quâsi eune garantie d'seûtheté pèrsonnelle.
I' m'sembl'ye tout d'même qué l'souô-disant progrès et la prospéthité d'nouos jours sont en grand' partie responsabl'yes pour un tas d'nouos troubl'yes. Les syndicats des travailleurs ont fait les gages monter si haut tch'i' faut quâsi eune forteune à ch't heu pour vivre au ras d'la qualité matérielle dé la vie modèrne. Lé couôtement d'eune maîson, par exempl'ye, est tel qu'un janne coupl'ye tchi veurt sé mathier et s'mett' en mênage sé met en si grand' dette pour en acater ieune qu' homme et femme sont oblyigis d'travailli pour y suffithe.
Dans bein des cas, la femme travâle même quand y'a d's êfants, auve lé rêsultat qué l's êfants sont êl'vés à Dgi l'Adert, et manque dé tchi faithe i' s'mett' à couôrre les c'mîns, trouvent mauvaise compangnie, et font mêché.
Et pis ch'n'est pon seulement l'couôtage d'eune maîson tchi garde les pathents en travas, mais ch'est l'moto, la télévîsion et toute la machinn'nie modèrne qué nou vait dans un mênage d'au jour d'aniet. Et les jannes mathiés veulent tout aver en lus mathiant. Ch'n'est pon comme lé temps pâssé quand les mathiés c'menchaient la vie conjugale atout eune armouaithe ou un drécheux, eune tabl'ye et un coupl'ye d'tchaises et un liet, et 'taient contents d'meublier un mio à la fais à m'suthe tch'i' pouvaient y'affaurder.
A ch't heu, un tas d'mousses ont trop d'sou à dêpenser, trop d'libèrté et trop d'laîsi et n'savent pon tchi faithe dé lus pé pour sé pâsser l'temps. V'la tchi mêne au mêché et au vandalisme tch'est si dêtestabl'ye viyant tch'i' n'a ni rînme ni raîson.
V'la tchi n'veurt pon dithe tch'i' n'y'en a pon d'bouans, d'ches mousses d'à ch't heu. I' n'faut pon les condanmer tous pour les mêfaits d'eune minnorité. Mais ch'a tréjous 'té m'n idée qué quand ches jannes mêchants-là sont présentés d'vant Justice et mîns à l'amende, les pathents dév'thaient êt' mîns à l'amende étout.
V'la tchi les f'thait êprouver à controller lus mousses s'il' 'taient forchis à dêbourser d'lus pouchettes. Acouo eune miyeu peunnition es'sait la baïette, mais j'pathais êt' tout seu d'ma sorte quand j'érquémande d'ité!
George d'La Forge
Viyiz étout: