Moussieu l'Rèdacteu,
Un vièr diton nouos dit qué quand la né reste sus la tèrre ou crie à d'autre. Eh bein, où'est qué j'sis, ichîn en Améthique, nou peut dithe qué ch'est vrai. Tout en est couvèrt, tèrre, rues, bouais et liefs dé maîsons sont bliancs - et nou peut dithe “bliancs comme la né” car ch'en est. Et ch'est bé à vaie, sans doute, mais ch'est eune embête dans les rues pour les motos et sus les trottouaithes pour les piêtons. L's autorités clièrgissent les rues atout des tchéthues à né (“snow ploughs” en Angliais). I' sont faites hardi comme des grand' tchéthues qu'nou vait en Jèrri. Mais ch'n'est pon des j'vaux tchi halent dessus. A c'menchi, à la pliaiche dé haler d'ssus dans chu cas, ch'est pousser driéthe, et atout des j'vaux mécaniques tchi baivent d'la pétrole. La né, grattée dé d'ssus l'nivé d'la rue par les fièrs dé la tchéthue, s'atchumule dé châque côté et fait un banc d'né haut comme un fossé quand veint l'pâssage du temps. Naturellement, oulle a pèrdu sa bliancheu au bas du banc l'long d'la rue, car les motos en font un pité en êcliatchant la saleté d'la rue en pâssant.
Dans cèrtaines villes, lé propriêtaithe a à clièrgi la né dé d'ssus l'trottouaithe en d'vant d'sa maîson. I' la tâsse sus l'banc d'né l'long d'la rue d'un côté, et sus la p'louse dé sa propriêté d'l'aut' côté. Quand v'la tchi s'trouve dans l'pays acouo pus fraid qu' ichîn, comme par exempl'ye à Ottawa au Cannada, eune pétite montangne s'atchumule à la hauteu des f'nêtres, tchiquefais acouo pus haut. Dans cèrtaines villes ichîn, l's autorités s'otchupent dé netti les trottouaithes étout.
Ichîn, dans l'Michigan, i' gèle dû dépis tchiques jours, et ouaithe qué j'aime mus la chaleu qu' la fraid, j'n'en souffre pon. Sans doute i' faut s'abrier comme i' faut d'vant sorti. Nou-s-est confortabl'ye dans les maîsons car il' ont l'cauffage central.
Quand j'vouos êcrithai la préchaine fais, jé s'sai probabliément dans la chaleu d'la Floride. Un aut' monde! Là, ch'est l'êté pèrpétuel et nou n's'embête pon d's'abrier pour sorti car i' r'fraidgissent les maîsons à la pliaiche dé les cauffer, et quand nou sort déhors ch'est la chaleu du solé tchi vouos frappe.
Mais, en pâlant d'né, comme j'tais à l'dithe à man fréthe Fraînque l'aut' jour, si les mousses en Jèrri viyaient chutte né 'chîn, il' êprouvethaient sans doute à s'astitchi atout des balles dé né comme nou l'faîsait en Jèrri dans les rares occâsions qu' nou-s-en viyait. Mais il' éthaient eune grand' surprînse. La né est g'lée, ichîn, et nou n'peut pon en faithe des balles car ou n'sé paque pon - oulle est trop poudreuse quand oulle est g'lée.
A ch't heu, j'mé d'mande tchi temps tchi'i' fait en Jèrri. J'n'ai pon r'chu grand' nouvelles dé l'Ile dépis qué j'la tchittis, y'a siex s'maines. J'ai veu la “Jersey Evening Post” du 31 d'octobre tchi montre des bieaux portraits du mathiage dé m'n anmîn l' Député Jean Amy L'Maistre à Mdlle. Jennifer Holley, dans l'églyise dé St. George (où'est qu' j'èrchu l'rite du Bâptême lé 11 d'octobre, 1891). J'lus souhaite jouaie et tout bonheur, et eune longue et heutheuse vie conjugale. Ch'est sans doute l'êvènement l'pus important rapporté dans chutte gâzette-là. L'préchain est l'annonce qué les femmes s'en vont aver la chance dé r'êprouver à êt' êlues pour siégi sus l'Banc d'Justice. J'ai dêjá pâlé du pour et l'contre dans ma lettre du preunmyi d'octobre; ch'est en tchi je' n'm'en vais pon vouos enn'yer en êcrivant eune répétition d'la même turlutte.
J'avons ieu un “congrès” d'femmes à La Nouvelle Orléans, en Louisianne, dreinement, pour distchuter et avanchi lé “Equal Rights for Women” tch'est l'ordre du jour ichîn en Amèthique. Chu congrès a couôté chîn millions d'dollars ès contribuabl'yes du pays. Si j'avais ieu la gâzette dé Jèrri en temps j'lus éthais env'yé la tchestchion d'pèrmett' des femmes Juges dans l'Ile pour mett' sus lus agenda, et v'la tchi n'éthait couôté rein au contribuabl'ye Jèrriais. Mais j'sai bein tch'est tch'éthait 'té l'rêsultat, car j'avons ieu des femmes Juges en Améthique pour bein d's années. Et i' lus craient tchiquechose, man bouanhomme! Nou n'peut pon en appréchi sénon au temps d'êlection - car les Juges sont êlus ichîn. Ch'est un bein mauvais procédé pour les Juges dans les P'tites Cours car il' ont peux d'êt' trop sévéthes et d'pèrdre la préchaine êlection. Heutheusement, ou n'avez pon l'même dangi en Jérri, car un Juré-Justicier est là jusqu'à l'âge dé r'traite obligatouaithe!
George d'La Forge
Viyiz étout: