Ottawa,
Ontario, Cannada.
Lé 6 d'mai, 1978.
Moussieu l'Rédacteu,
Lé portrait d'l'empliaichement où'est tch'i' sont à brûler les d'chets sus Les Landes à St. Ouën montre qué l'Sieur Kenneth Vibert a raîson dé s'pliaindre. Quand l'sujet fut entanmé l'année pâssée, les cheins tch'étaient en faveur disaient qué ché s'sait seulement eune affaithe d'aver des camions apporter lé r'fus pour brûler, et tch'i' n'y'éthait pon d'papi f'né par les c'mîns. Il' allaient êt' si r'gardants qué ché s'sait à peine si nou vêrrait l's ortchiéthes des reues d'camion dans le c'mîn tchi mène au creux brûlant. A les ouï nou-s-éthait peut penser qué ché s'sait d's Anges tch'éthaient la tâche dé condithe les camions chèrgis d'chêts ès Landes pour êt' conseunmés dans l'feu.
Hélas! Ché n'tait pon pour être, car lé portrait dans la gâzette montre comme si ch'tait eune pétite ville tchi couronne lé creux brûlant. Et ch'est justément chein qué l'Sieur Vibert avait prédit. Et pis i' veulent y mett' un pont-bascule! Pourtchi? B'ser les d'chêts pour rêcompenser les Landîns au taux dé tant par livre, p't-êt' bein? Si ch'est là l'cas, v'la tchi vaudrait la peine dé lus accorder la pèrmission nécessaithe!
Ervenant au sujet des dêpenses dé tchi j'vouos pâlais dans ma lettre du vîngt-neuf d'avri, j'vai tch'i' y'a tchestchion d'dêpenser septante-chîn mille louis pour acater eune maîson appelée Le Nid auve l'idée de l'abattre pour êlaîzi la rue. N'èrvélà un aut' exempl'ye d'env'yer des sou à la route! L's autorités n'pathaîssent pon êt' heutheux sans înventer tchiquechose pour dêpenser les sou du contribuabl'ye.
J'èrgrette dé vaie tch'i' y'a tchestchion d'abattre la chapelle dé l'Hôpita. Ché s'sa sans doute pour en bâti eune neuve tchi s'sa liain d'êt' aussi belle car ou né s'sa pon bâtie en granit. S'i' pouvaient présèrver la vèrrinne dé l'est et la mett' dans la neuve chapelle v'la tch'aîguethait à lî donner un air ecclésiastique, mais i' faudrait un haut bâtisse, et v'la tchi couôte ches jours. Mais pourtchi eune neuve chapelle quand y'en a dêjà eune si belle? Est-ch' qué ché s'sait trop liain à marchi pour les cheins tchi peuvent y gabather? Ch'est honteux tch'i' faut tréjous condâmner des bâtîments historiques dé même qué nou-s-a connus toute eune vie. Si l'affaithe continnue j'n'èrconnaitrons pus la ville dé St. Hélyi!
I' faut féliciter l'Sénateu (et Avocat) Ralph Vibert pour aver 'té honoré par Sa Majesté la Reine Elizabeth, nouot' Duc, tch'i' lî'a accordé l'grade d'Officiyi d'l'Ordre dé l'Empire Britannique. Jé n'connais pon autcheune aut' pèrsonne tchi l'méthite pus qu' li, et j'lî souhaite bein d's années à siégi dans L's Etats où'est qu'sa vouaix et sa présence sont un appias, et eune ancre dé sagesse dans touos les débats.
Et j'sis content d'vaie l'portrait du Sieur George Brasford et d'liéthe l'întérêssante articl'ye tchi nouos donne eune idée d'ses activités duthant des longues années pour lé bénéfice du thiâtre en général et du Green Room Club en partitchulyi. Et v'là tchi m'ramémouaithe man janne temps en Jèrri quand j'tais membre du Green Room Club et des Dickens Players. J'tais dans l'chant à l'occasion d'la production des “Gondoliers.” Et j'avais eune pétite part dans lé “Christmas Carol” (et dans d'aut' pliaiches produites par Teddy Boielle) et qué j'chantis eune chanson composée spécialement pour l'occâsion par lé Sieur Boielle et la mûsique par un Sieur Curzon tch'était, j'crai, organiste pour iun des thiâtres. J'avions d'mangnifiques séthées ès pratiques. Dans l'cas des Dickens Players j'avions tréjous un fanmeux parti d'Noué siez l'Sieur Boielle. Ch'tait la dgèrre dé 1914-18 tch'înterrompit m's activités d'ches bieaux jours-là en Jèrri. Mais èrvénant au Sieur Brasford. V'la tchi m'fait grand pliaîsi d'vaie san souôri et d'ouï sa beinv'nue touos l's ans quand j'vais au “Motor Tax Office” èrnouveler la licence pour man moto, et j'lî souhaite acouo bein d's années à orner la strade du thiâtre en Jèrri.
Quandi qu' les félicitâtions sont en ordre, i' faut féliciter les St. Pièrrais d'aver agrandi la réprésentâtion officielle dé la fanmil'ye du Connêtabl'ye Winter Le Marquand comme administrateurs dé la pâraisse en nommant san fis Wilson à la cherge dé Chent'nyi. J'n'ai pon 'couo ieu l'honneu dé rencontrer l'nouvieau Chent'nyi, mais sus san portrait i' pathaît aver eune bouanne tête et si j'tais prophète j'dithais: “Tel péthe, tel fis, et né v'la un fututhe Connêtabl'ye!”
George d'La Forge
Viyiz étout: