Le Ménage ès Feuvres,
St. Ouën.
Lé 29 dé juin, 1974.
Moussieu l'Rédacteu,
Comme lé temps s'pâsse! En Améthique y'a un mais, j'tais à liéthe la copie d'eune lettre qué j'env'yis à “La Chronique de Jersey” lé 5 dé juilet, 1947. Quâsi 27 ans pâssés d'pis. En a-t-i pâssé d'l'ieau par La Corbiéthe duthant chu temps-là! L'occâsion mentionnée dans ma lettre 'tait l'institution d'nouot' respecté Recteur, lé Révérend Canon Douard Richardson, comme Recteur dé la pâraisse.
Le chose tchi m'frappe est l'nombre d'Mêssieux présents à ch't' occâsion-là tchi sont au r'pos êtérnel. En procêssion tchi mène au grand Autel du Sanctuaithe dé l'Églyise Parouaîssiale, y'avait, entr'autres, lé Douoyen Matchi L'Mathinné et les Vice-Douoyens Valpy et Tabb. Et les Révérends Norman, d'St. Sauveux, et Lemprièthe, dé St. Martin, touos des Jèrriais ouaithe qué Moussieu Tabb (Recteu d'St. Brélade) avait un nom Angliais. I' n'sont pus du rang des vivants, mais au Dînmanche, présent au sèrvice solonnel dé La Sainte Cène, j'aime à penser qué, d'lus pliaiches dans l'Chant d'l'Églyise Triomphante au Ciel, i' nouos joingnent dans l'Gloria d'La Sainte Commeunion auve les Anges et Archanges et l'Armée des Cieux, comme nouos l'dit la Litourgie à la page 154, en chantant “Saint, Saint, Saint, Seigneur Dieu des Armées, les Cieux et la Terre sont remplis de Ta gloire : à Toi soit gloire, O Dieu très-haut!”
Y'en avait bein des piéches dans la congrégâtion chu bieau jour-là tchi n'sont pus. Lord Coutanche, dans sa capacité d'Bailli, en est iun. L's officièrs dé la Couronne y'étaient étout, mais jé n'm'èrsouveins pon d'lus identité pour lé moment. Lé p'pèe à Moussieu Richardson, Avocat près d'La Cour Rouoyale, 'tait là étout. Et l'Gouvèrneux, Messire Edward Grassett, tchi présentit l'Recteur. I' n'sont pus ni n'tout. J'm'èrsouveins qu' man vièr anmîn et vaîsîn, l'dêfunt Alfred Maugi (fis Elie, du Pîngnon, ès Landes), 'tait iun des Seuvillants, et qué l'Connêtabl'ye Francis Le Boutilyi (pus tard Juge) et sa danme 'taient présents, et qu' l'Connêtabl'ye fit un discours auprès l'sèrvice pour faithe la beinv'nue au Recteur et à Madanme Richardson au nom des parouaîssiens. Hélas! J'vai lus noms sus lus tombieaux dans l'chînmtchiéthe quand j'sis en Jèrri à ch't heu à la pliaiche dé lus souôriantes philomies quand i' m'faisaient la beinv'nue à “Highfield”.
Y'avait au mains deux Connêtabl'yes d'houors pâraisse présents étout, l'Connêtabl'ye Charles Billot, d'St. Martin, et l'Connêtabl'ye Sydney George Crill, dé St. Cliément. J'allais quâsi oublier d'vouos dithe qué j'tais présent au sèrvice d'înstitution auve lé Juge Francis Vibert Le Feuvre et sa danme. Les Connêtabl'yes Billot et Crill et l'Juge Le Feuvre et sa danme sont tous au grand r'pos. Mad'mouaiselle Enid Le Feuvre, Député ès Êtats, 'tait auve nous étout.
Ch'tait eune grand occâsion pour les St. Ouënais, et l'sèrvice d'înstitution d'un minnistre comme Recteur dé sa pâraisse est hardi întérêssant. L'églyise 'tait plieine, et j'eus d'la peine à trouver eune pliaiche pour stâtionner man moto. V'la tchi m'fit arriver à l'entrée d'l'églyise quand la procêssion, la Crouaix d'la Pâraisse en tête, 'tait dêjà en c'mîn pour l'Autel. Lé chant 'tait mangnifique.
Auprès la présentâtion du nouvieau Recteur par lé Gouvèrneux et qué l'Recteur eut prîns l'sèrment voulu, cèrtains dotchûments tchi veinnent dé l'Éveque dé Winchester fûdrent lius par Moussieu l'Douoyen. À la siète des priéthes et des louanges, lé Recteur fut condit l'tou d'l'églyise, à la grand' porte, ès fonts batismaux (pour tchique raison qué jé n'comprends pon, un tas d'anciens Jèrriais appelent les fonts l' “Bênêtchi”), au cliochi pour tch'i' sonnîsse la clioche, dans l'Consistouaithe et finnalement au grand Autel.
À chaque stâtion, l'Recteur promet dé s'atchitter auve soin et conscienche, de condithe les rites et administrer les sacrements et les d'vés et sèrvices qué la Saint Églyise donne à ses dévoués et fidèles du moment d'naîssance au drein soupi et à la tombe. Les deux Seurvillants, portant lus bâtons d'office, sont à la tête dé la procêssion l'tou d'l'églyise.
Lé Douoyen L'Mathinné, à m'n idée iun des saints sus la tèrre dans san vivant, nouos fit un bouan sèrmon, et auprès tch'il avait prononcé la Bénédiction, du grand Autel, j'nouos en feûnmes à la Salle Parouîssiale pour des rafraîchissements.
Eh bein, bouannes gens, les cheins d'parmi nous tch'ont l'bonheu, par la grâce du Bouan Dgieu, d'êt' acouo en vie vîngt-sept ans auprès ch't occâsion, peuvent rendre hommage à Moussieu Richardson pour lé supèrbe exèrcice dé sa vocâtion comme prêtre et Recteur dé nouot' pâraisse duthant pus d'un quart dé siécl'ye, et à la mémouaithe dé sa grâcieuse danme pour la manniéthe qu' oulle a donné génétheusement à l'Églyise et ès bouannes oeuvres d'la pâraisse dans san vivant. Il' ont gangni l'respé et l'amiêtchi d'touos lus parouaîssiens, un don tchi n'est pon donné à tout l'monde. Espéthons qué Moussieu Richardson s'en va continnuer à être lé bouan bèrger d's affaithes ecclésiastiques dé nouot' pâraisse pour bein d's années à l'av'nîn.
George d'La Forge
Viyiz étout: