Le Ménage ès Feuvres,
St. Ouën.
Lé 9 dé juin, 1973.
Moussieu l' Rédacteu,
M'èrvélà en Jèrri acouo eune fais, un an pus vyi mais, Dgieu mèrcie, acouo pliein d'vie dans l'corps et d'ambition d'y r'vénîn bein d's années à l'av'nîn. Quand nou d'meuthe à l'êtrangi, ch'est r'mèrquabl'ye comment qué l's idées s'envolent tréjous à la pliaiche où'est qu' nou-s-a veu l'jour. Et ouaithe qué nou la trouve changie nou l'aime quand-mème. J'ai un esprit èrrant tchi m'a condit dans bein des pays du monde, mais ch'est Jèrri tchi m'pâsse tréjous l'pus près du tchoeu.
Chutte fais, j'm'embèrtchis, à l'aérodrome dé Detroit, Michigan, à sept heuthes et d'mie du sé du 31 d'mai, à bord d'un avion Boeing 747 tchi porte trais chent septante pèrsonnes à la fais, et i' n'y avait pon eune seule pliaiche viède quand i' prînt vol. J'arrivînmes à Boston, Massachusetts, dé vièrs neuv heuthes. J'en r'sortînmes dans les dgiex heuthes et d'mie, et j'arrivînmes à Londres à neuv heuthes lé matîn du preunmyi d'Juin. I' prins pus d'eune heuthe à pâsser les 370 pèrsonnes pardévant l's officièrs d'Inmigrâtion et d'la Douanne à Londres. Chutte pèrte d'temps-là est l'seul d's'avantage qué j'vai à viagi dans ch't avion-là, et il est pourtant un mangnifique navithe des airs, rapide et confortabl'ye. L's Améthitchains sont à sé d'mander pourtchi dêpenser des forteunes à acater l'Concorde Anglo-Français quand l'Jumbo 747 est si satisfaîsant. L'avantage du Concorde, pathaît-i', est sa grand' vitesse. Ch'est à saver s'i' y'étha assez d'Améthitchains întérêssis à viagi si vite pour en encouothagi l'acat.
La dreine gâzette qué j'avais r'chu en Améthique 'tait la cheinne du 19 d'avri, ch'est en tchi il a fallu liéthe les cheinnes tchi siévent. Eune chose tchi m'a fait grand pliaîsi est d'vaie la nouvelle, dans la cheinne du 28 d'avri, qué m'n anmîn, l'Académicien Fraînque Le Maistre, a 'té titré Docteu “honoris causa” par décret officiel du Ministéthe National d'Êducation d'la France à Paris. Un honneu pon seulement pour li mais pour nouot' pâraisse natale dé St. Ouën, et pour toute l'Île étout.
Dans la gâzette du chînq dé mai, j'vai un bieau portrait d'la Milice Rouoyale dé Jèrri en Grand' R'veue d' mil neu chent huit sus les sablions d'la Baie d'St. Aubin, donné à la gâzette par lé Sieur George Le Cocq qué j'ai l'honneu d'pouver appeler m'n anmîn étout. J'tais là mé-mème chu jour-là, ayant 'té accoutré ch't' année-là ouaithe qué j'n'avais qu' seize ans l'mais d'septembre d'l'année dé d'vant, viyant qu' j'avais gangni la tchulyi comme sîngnaleux dans les r'crus et tch'il' 'taient à cour dé sîngnaleurs dans l'Bataillon du Ouest. J'm'èrsouveins qué j'tais ordgilleux comme un poux tchi marche sus du v'lous l'preunmié jour qué j'mîns l'arme à l'êpaule auve la baïonnette au canon. Et l'jour dé la Grand' R'veue j'tais si ordgilleux d'ma rouoge câsaque et man chapé atout l'pitchet sus l'haut qué j'restit habilyi d'mème tout l'jour. En r'gardant chu portrait-là i' m'sembl'ye quâsi qu' ch'est mé tch'est l'traîsième du but du preunmié rang à gauche, mais j'n'en prendrais pon sèrment. Jé d'meuthais à La Mouaie d'St. Brélade dans chu temps-là, et j'tais dans la compangnie d'chutte pâraisse-là. P't êt' qué l'Sieur George Le Cocq peut nommer les cheins tch'y sont, dans l'preunmié rang, car il a eune mémouaithe formidabl'ye.
J'avons tréjous 'té ordgilleurs dans ma fanmile, qué j'tions soudards dans l'Bataillon du Ouest d'la Milice Rouoyale, et qu' nouot' péthe fut iun des miliciens d'chu bataillon-là condamnés à peine dé prison lé 18 mai, 1891, pour aver r'fûsé d'marchi duthant l'exèrcise dé brigade viyant qué l'bataillon n'avait pon 'té donné sa vêthitabl'ye pliaiche à la tête dé marche.
J'm'èrsouveins, étout, qu'à eune Grand' R'veue, lé Gouvèrneux, i' m'sembl'ye qué ch'tait l'Général Hugh Sutlej Gough, nouos dit tch'il avait veu touos les régiments d'l'armée Britannique en parade, mais tch'i' n'en avait janmais veu comme nous, et i' y'eut des hourras à s'n honneu. Naturellement, nou criyait tch'il entendait tch'i' n'en avait janmais veu d'si âpres à l'exèrcice, mais j'mé sis souvent d'mandé d'pis s'il entendait tch'i' n'en avait janmais veu d'si gauchets, car i' faut dithe qué la grand partie d'nous 'taient pus adèrts à t'nîn la tchéthue qu' l'arme.
J'ai veu, auve grand pliaîsi, tch'i' y'a tchestchion d'empêchi les motos d'êt' stâtionnés à Dgi l'Adèrt partout dans les mielles et les Blianches Banques, eune habitude tch'est dév'nue eune embête pour tout l'monde à pid, et eune destruction des flieurs et crututhes naturelles. J'ai un mio d'tèrre mé-mème dans les mielles, mais ch'est couvèrt dé motos d'toutes les sortes à londgieu d'jours tout l'êté et jé n'peux pon en joui mé-mème. À m'n idée, ch'est absolûment inutile d'espéther pour un r'miède volontaithe dé la part des motoristes, et j'sis en favour dé lus fourni d's empliaichements conv'nabl'yes pour stâtionner, et d'forbanni les motos tout-à-fait des Blianches Banques et des Mielles.
George d'La Forge
Viyiz étout: