Trenton, Michigan,
U.S.A.
Lé 10 d'novembre, 1973.
Moussieu l'Rédacteu,
M'y r'vélà acouo eune fais, en Améthique, et il y fait fraid - au mains dans l'Êtat d'Michigan où'est qué j'sis siez man fréthe Fraînque pour lé moment. I' n'y a qu' eune pétite couoche dé né sus san pas d'porte, mais la télévision veint d'nouos dithe tch'i' y'en a sept pouces d'êpais dans l'nord dé l'Êtat. I' fait quand même bieau solé dans l'jour, et la né dispathaît. Les rues sont décorées à des bords par les fielles dé bouais qué l'vent parfêne ichîn et là.
Lé viage dé Jèrri et d'Londres par avion s'fît trantchillement à 31 mille pids en l'air dé Londres à Philadelphie en Pennsylvanie dans un Boeing 707. J'avais fait l'viage dé Detroit (Michigan) à Londres à la fîn d'mai dans un Boeing 747 - qué l's Angliais appellent un “Jumbo Jet” - mais j'aime mus l'pus p'tit 707. J'tions 370 passagièrs dans l' 747 et i' prînt trop longtemps à pâsser l's offices d'Immigrâtion et d'la Douanne en arrivant à destinnation.
En r'vénant, j'avais tréjous 'té dans d's avions tch'arrêtaient à Boston en c'mîn pour Detroit, mais chutte fais ch'tait à Philadelphie qu' j'arrêtinmes. V'la tchi prend eune heuthe dé pus, ch'est en tchi nou peut conter eune travérsée d'dgiex heuthes dé Londres à Detroit - sept heuthes à crouaîsi l'Atlantique, eune heuthe à gangni Philadelphie, eune heuthe d'attente là, et eune heuthe dé là à Detroit. Quand l'arrêt est à Boston lé viage prend eune heuthe dé mains.
Ch'tait pliaisant d'vaie la fache souoriante dé Fraînque à m'attendre à l'aéroport dé Detroit, et j'avons 'té à bailli d'nouot' becque entouorre Jèrri d'pis m'n arrivée. I' veurt saver si j'dis à bétôt d'vant m'en v'nîn à touos l's anmîns, et comme en était l'cas dans bein d'aut' années, j'ai ieu à avouer qu' j'ai mantchi à man d'vé à ch't êgard-là. Ch'est tréjous la même turlutte les dreins jours en Jèrri d'vant l'tchitter et j'sis forchi dé d'mander acouo eune fais à un tas d'mes anmîns, et même à couôsins et couôsinnes, dé m'pardonner. Ch'n'est pon manque dé volonté, mais i' sembl'ye qué y'a tréjous tchique empêchement à la dreine minnute et qu' nou finnit tréjous par n'aver pon l'temps d'faithe tout chein qu' nou dév'thait faithe. Par exempl'ye, un êvénement inattendu m'fît rester quatre jours à la maîson duthant ma dreine sémaine en Jèrri ch't année, des jours qué j'avais pensé faithe sèrvi pour aller payi visite ès anmîns. Lé moto responsabl'ye pour faithe pomper l'ieau du pits dans l'Ménage rendit san drein soupi, et j'fus oblyigi dé l'faithe rempliaichi.
Mén êté en Jèrri a 'té pliaîsant, mais j'ai acouo ieu l'triste d'va d'aver à siéthe d's anmîns au chînm'tchiéthe, entr'autres, Missis Alice Carré, Douard Vautchi et la bouannefemme Missis George J'valyi qué j'soulais vaie à l'Églyise dé St. George quand ou y'allait acouo à pid touos les Dînmanche matîn à l'âge dé 91 ans. Et pis l'charmant Connêtabl'ye Clifford Le Vesconte. Et duthant mes dreins jours Missis Veuve du Heaume, née A'court - et je n'pus pon aller à s'n entèrrement viyant qué ch'tait l'vendrédi l'arlévée et i' fallait qué j'fûsse en ville pour affaithes importantes qué jé n'pouvais pon r'mett' à sanm'di viyant qu'les banques sont freunmées, ni à lundi viyant qué j'tchittais l'aéroport à huit heuthes 40 lé matîn. J'sis don oblyigi d'présentér mes condoléances à Moussieu et Madanme Henry L'Gresley, et à Mdlle du Heaume, dé chutte grand' distance ichîn, et d'exprînmer man grand r'grét d'n'aver pon 'té à l'entèrrement où'est qu' j'éthais voulu tout spécialement pouver êt' présent viyant qu' la décédée 'tait la veuve dé man maître à l'Êcole du Dînmanche à St. George quand j'tais mousse.
Ichîn en Améthique tout n'est pon roses. En Jèrri, un tas d'gens trouvent à r'dithe contre les membres d's Êtats, mais ch'n'est rein à compather à chein tch'i' s'pâsse dans l'Congrès à Washington. Les Démocrates, les sŷndicats travaillistes et les gâzettes font d'lus mus pour faithe nouot' Président démissionner viyant qu' san parti (Républicain) fît d'l'espionnage contre lé leur en temps d'êlection - dé tchi qu' les Louothièrs et les Rôsièrs faisaient à St. Ouën quand j'tais mousse, et qu' les Démocrates ont cèrtainement fait ieux-mèmes étout. Et j'avons grand bésoin d'un homme comme lé Président Nixon, tch'a du paids dans ses manches et du couothage à gogo, pour condithe l's affaithes dé la nâtion duthant ches temps troubl'yes dans l'Mouoyen Orient, et l'manque d'huile m'nichi par les pays Arabes justément dans un temps qu' j'en avons l'pus d'bésoin à cause d'eune prospéthité tch'augmente sén ûsage touos les jours. Et ses ennemîns oublient tch'il a ramené nouos soudards du Vietnam et qu' ch'est grâce à li qué j'sommes au mains pus à nouot' aise auve les Russes et les Chinnouais. Mais tchi sèrt lé publyi sèrt un îngrat!
George d'La Forge
Viyiz étout: