L'futhet du bouais joli
ou
Le furet du bois joli
Toutes ches vielles chansons dansantes, et jeux d'aut'fais, n'sont pus du tout en Jèrri. I' soulaient êt' hardi bein connues et populaithes à des séthées d'compangnies, et autrément. N'en v'chîn ieune qué nou-th-a 'couo ouï tchiquefais du temps d'nouot' jannèche. Ch'est seux qu'oulle est acouo jouée, dansée et chantée à des bords en Nouormandie, et ofûche ailleurs. Enfin, n'en v'chîn eune pétite description.
Les femmes et l'th avièrs lus mettent en rond, tout en t'nant dans lus mains tout l'tou eune forte ficelle sus tchi est enfilée eune sîmpl'ye bague en or. I' pâssent la bague dé iun à l'aut' tout l'temps, ou bein font la minne dé la pâsser, bouogeant les mains sans cêsse sus la ficelle, à seule fin qué la pèrsonne tch'est dans l'mitan du rond (ch'est là l'Futhet) né piêsse trouver la bague aîthiement, sinon en d'vinnant. Mais enfîn, si par chance lé Futhet happe tchitch'un (faut qu' châtchun ouvre les mains quand l'Futhet l'démande), eh bein, ch'ti-là ou chette-là prend san tou dans l'mitan du rond et d'veint l'Futhet. La ficelle fait l'tou d'un sens ou d'l'aut', et la bague au contraithe. Ch'est êtonnant l'excitement tchi s'dêv'loppe d'un patheil sîmpl'ye ji. Et né v'chîn chein qu' les gens y prannant part chantent sans cêsse, tout en dansant et en pâssant la bague:
I' couort, i' couort, lé futhet,
Lé futhet du bouais, mesdanmes;
I' couort, i' couort, lé futhet,
Lé futhet du bouais joli.
Il a pâssé par ichîn,
I' r'pâss'sa, r'pâss'sa par là.
Il a pâssé par ichîn,
I' r'pâss'sa, r'pâss'sa par là.
L'air est bein connu, et n'est pon béthoin dé l'donner. Et y'a cèrtaines vèrsions difféthentes, selon l'th uns ou l'th aut's. Quand ch'tait sans mûthique, ch'tait jouer à la bague bèrgère — qué nou dîthait.
Viyiz étout:
Auprès siêx heuthes dé fraction
La Villie
L'Assise de la Veille