| Messire Èrthu d'la Mathe pâssit l'pas lé 15 dé Dézembre 1994. Né v'chîn sa dreine articl'ye tch'appathut dans la Gâzette du Sé lé 16 dé Dézembre 1994. |
Cha tait eun temps mînsérablye pour me, car mon bouaun vièr parchounnyi, le Ph'lip Desclios, n'est pus avec nous. I' passit l'pas subitement l'aut'jour.
Ch'tait eune houmme fort. Nou disait en riant qu'i' n'éthait pas fallu huit ch'vaux sus la grand' tchérrue; le Ph'lip tout seu l'était trainée. I' n'avait pas d'peux du travas. I' gardait eune douzaine de bêtes à corne, mais i' n'avait pas d'domestique et faisait tout son tripot li-même, et trouvait l'temps de v'ner souvent passer eune demi-heuthe avec me.
Et lé v'là, i'n'est pus sus chutte terre. Coumme les vièrs disaient: “Tout passe, tout lasse, tout casse”. Il en est d'même de touoas d'nous.
Quand à mé, il est temps que j'paque mes telles étout. Mes ièrs me disent que j'en ai ieu assez, et me v'là presqu' aveugle. Et d'même i' faut qu'j'abandounnes mes “Countes d'eun Ervenu” et mes autres grivouôillyies. Chu counte est mon dérnyi, et ch'est la dérnié fais que je m'signe...
Viyiz étout: