Exode
Chapitre 11, vèrset 5
Et touos les preunmié nés dans l'pays d'Êgypte mouothithont, du preunmié né d'Pharaon assis sus san trône jusqu'au preunmié né d'la sèrvante d'la meule, et chenna auve touos les preunmié nés des bêtes.
Chapitre 12, vèrsets 1-2
Et l'Seigneu dit à Moïse et Âron dans l'pays d'Êgypte, "Qu'chu mais-chîn sait pouor vous l'preunmié des mais, l'preunmié mais d'l'année."
Chapitre 12, vèrset 7
Épis prannez un mio du sang et douothez-en les deux bords d'la porte et au d'ssus d'la porte d'la maîson où'est qu'nou s'en va mangi l'èrpas.
Chapitre 13
Lé Seigneu pâlit à Moïse et dit, "Consacre-mé châque preunmié-né. Châque preunmié-né parmi les fis d'Israël, si ch'est un houmme ou un annima, est à mé."
Moïse dit au peupl'ye: "Souv'n'-ous d'chu jour-chîn, lé jour quand ou sortîdres d'Israël, du pays d'l'escliavage, par cause qué l'Seigneu vos en emm'nit par sa main piêssante. N'mangiz rein tchi contcheint du l'vain. Ou sortez aniet dans l'mais d's êpis. Quand l'Seigneu t'étha fait entrer dans l'pays des Cananéens, des Hittites, des Amoriens, des Héviens et des Jébusiens - l'pays qu'il avait juthé à tes anchêtres dé t'bailli, un pays où'est lé lait et l'myi coulent, tu mèrquéthas chutte cérémonnie chu mais: pendant sept jours, tu mang'geas des pain sans l'vain, et l'septchième jour y'étha eune fête en l'honneu du Seigneu. Mange pendant sept jours du pain sans l'vain; nou n'vèrra pon siez té autcheune chose auve du l'vain, et n'y'étha pon dé l'vain dans tout l'pays. Tu dithas don à tan fis: Ch'est en mémouaithe dé chein qu'lé Seigneu a fait pouor mé, quand j'sortis d'Êgypte. ché s'sa pouor té un sîngne sus ta main et coumme un mémouaithe entré tes ièrs, à seule fîn qu'la louai du Seigneu sait dans ta bouoche. Ch'est en tchi l'Seigneu t'emm'nit d'Êgypte par sa main piêssante. Tu mèrquéthas chu c'mandement au temps tèrmié année auprès année.
Quand l'Seigneu t'étha fait entrer dans l'pays des Cananéens, coumme i' l'a juthé à té et tes anchêtres, que qu'i' t'l'étha bailli, tu consacréthas au Seigneu châque preunmié-né, même châque preunmié-né d's annimaux qu'tu'éthas. Les mâles preunmié-nés d'tes annimaux appartcheinnent au Seigneu. Tu racat'tas auve un angné châque preunmié-né d'l'âne, mais s'tu né l'racate pon, tu lî bûch'chas l'co. Racate châque preunmié-né étout parmi tes fis.
Et quand veindra l'jour quand tan fis té d'mand'da: "Tch'est qu'chenna veurt dithe?" di-li, "Auve eune main piêssante lé Seigneu nos emm'nit d'Êgypte, du pays d'l'escliavage. Quand l'Pharaon 'tait têtouongne et r'fûsit d'nos lâtchi aller, l'Seigneu tuit l'preunmié-né des gens et d's annimaux en Êgypte. Né v'chîn pouortchi j'sacrifyie au Seigneu l'preunmié-né des mâles et racate châtchun des preunmié-nés d'mes fis.
Ché s'sa coumme un sîngne sus ta main et un sŷmbole entre tes ièrs; ch'est en tchi ch'est par sa main piêssante qué l'Seigneu nos a fait sorti d'Êgypte.
Quand l'Pharaon lâtchit aller l'peupl'ye, lé Bouôn Dgieu n'les m'nit pon par lé c'mîn du pays des Philistîns, ouaithe qué ch'fûsse lé pus court. Ch'est en tchi l'Bouôn dgieu dit: "S'i' sont enfachis d'la dgèrre, i' pouôrraient changi d'avis et rentrer en Êgypte." Lé Bouôn Dgieu don les m'nit par un dêtou par lé c'mîn du d'sèrt, d'vièrs la Rouoge Mé. L's êfants d'Israël amontîdrent hors d'Êgypte prépathés pouor la batâle.
Moïse apportit auve li l's os d'Joseph, car Joseph avait fait l's Israëliens juther. Il avait dit, "Lé Bouôn Dgieu veindra pouor lé seux à vot' aîgue, épis ous éthez à porter m's os d'ichîn amont acanté vous."
I' partîdrent dé Succoth, et i' campîdrent à Étham sus l'bord du d'sèrt. Lé Seigneu allait l'avant à ieux. Lé jour dans un pilyi d'nouage pouor les dgider dans lus c'mîn et la niet dans un pilyi d'feu pouor les êcliaithi, à seule fîn qu'i' marchîssent niet' et jeu. Lé pilyi d'nouage n'abandonnit pon sa pliaiche l'avant au peupl'ye dé jour, nitout l'pilyi d'feu la niet.
Chapitre 22, vèrsets 5-6
Si un houmme saque un feu dans un clios ou un gardîn d'vîngnes et laîsse brûler l'clios à un aut', i' dait bailli en rêcompense l'miyeu avoût d'san clios ou d'san gardîn d'vîngnes. S'i' y'a un feu et les fliambes en aveinnent ès êpîngnes lé tou du clios en avrônant les dgèrbes ou l'grain ou l'clios, l'chein tchi fit l'feu étha à rêcompenser l'damage.
Chapitre 22, vèrsets 21-24
Ou n'veng'gez pon autchun horsain; ch'est en tchi ou 'têtes des horsains au pays d'Êgypte. Ou né f'thez pon d'ma à autcheune veuve, à autchun orphélîn. S'ou lus f'thez ma, quand i' criethont à mé, j'm'en d'ment'tai dêliêment d'lus cri: ma mârrisson brûl'la, et j'vos tueûthai atout l'sâbre, et vos bouonnefemmes s'sont veuves et vos mousses orphélîns.
Chapitre 23, vèrset 25
Louangiz l'Seigneu vot' Dgieu, et sa bénédiction s'sa su vot' mangi et ot' ieau. J'hall'lai la maladie d'entré vous.
Chapitre 28, vèrsets 33-34
Et ou l'ouôl'lez atout des pommes-grénades en bliu, en pourpre et en rouoge, tout l'tou du ouôlet, atout des cliochettes entr' ieux tout l'tou: eune cliochette d'or et eune pomme-grénade, eune cliochette d'or et eune pomme-grénade, tout l'tou du ouôlet d'la robe.
Chapitre 35, vèrset 3
Qu'nou n'saque pon d'feu dans autcheune dé vos maîsons l'jour du Sabbat.
Chapitre 40, vèrsets 17-30
Épis don l'preunmié jour du preunmié mais d'la s'gonde année nou griyit la Maîson. Ch'fut Moïse tchi griyit la Maîson en pliaichant les choutchets et mâtant les mâtants et pitchant les pitchets et l'vant les pilièrs; et i' raidit la couvèrtuthe sus la Maîson pouor la couvri; tout coumme lé Seigneu li'avait c'mandé. Et i' prînt l'alliance et la mînt dans l'baheur et ridgit les longiéthes des deux bords et l'couvrit. Et il apportit l'baheur dans la Maîson et pendit l'vouaile à l'avant du baheur d'l'alliance à seule fîn dé l'vouailer coumme lé Seigneu li'avait c'mandé. Et i' mînt la tabl'ye dans la tente d'assembliée du bord du Nord d'la Maîson en d'houors du vouaile. Et il areunnit l'pain là-d'ssus coumme lé Seigneu li'avait c'mandé. Lé crâsset i' mînt dans la tente d'assembliée endrait la tabl'ye du bord du Sud, et il alleunmit les veues l'avant au Seigneu coumme lé Seigneu li'avait c'mandé. Et i' mînt l'auté d'or dans la tente d'assembliée l'avant au vouaile et y brûlit d'l'enchens coumme lé Seigneu li'avait c'mandé. Et i' gryit un ridgieau à l'entrée d'la Maîson, et à l'entrée d'la tente d'assembliée i' griyit l'auté des brûl'lies et y'offrit l'sacrifice brûlé et l'sacrifice dé grain, coumme lé Seigneu li'avait c'mandé. Et entré l'auté et la tente d'assembliée i' mînt l'bachîn et y vèrsit dé l'ieau pouor la lav'thie.
Viyiz étout: