Les Pages Jèrriaises

Ès vrais Jerriais

Heu pietas! Heu prisca fides. - Virgile.

D'pis bain des longues années, j'ai t'ai si liain d'ichen,
Que dans tous les pays j'ai fait un buon but d'qu'min.
Tréjous liain de ch'que j'aime, ai tréjous liain des mains,
Je m'consolais un miot: la pensaie d'Saint Lourrains
M'erlevait les esprits. Ai quand dans une contraie
J'viais un mauvais rouai qu'opprimait ses sujaits.
J'pensais à Jerri ai je m'disais: "Ma fé
De tout ch'qui ya au monde n'ia rain d'itai comm' té,
J'avons la paix étout ai la prosperitai."
Ai j'pensais au Jerriais, un' langue qui m'est bain chière,
Car ch'est un monument qui nous rappell' nos pères:
Ai je m'disais ocquo: "Cosole-té, mon éfant,
Tu f'ras coum'un liaivre qui cuorre devant les chans,
I' fait un grand détou ai i'rvain à san nid;
Tu f'ras coum' ch'la, cré mé; Jerri t'verra muorri,
Tan corps erposera dans le maîme chimetière,
Ai dans le maîme tombé que les os de ton père."

Enfin, chu jour là vint. J'm'embarque ai ov un rie,
J'attairîmes sans trop d'peine dans la nouvelle cauchie.
Quand j'arrive sur le quai, j'entends pâlé angliais
Ai tus cheux qu' j'vis pas iun n'pâlait Jerriais,
V'la qui me fit d'la peine, mais enfin je me dis
Que dans un port de mé nous entend tuos les d'vis.
Je m'en fus d'là en ville; mais coum' tout a changi,
Je n'm'y reconnaissais pon avant d'vais l'vier Marchi,
J'erconnus la Chronique ai la Cohue Royale,
Ai pis la Vieille Eglise ai la Statue Royale.
J'trouve là l'amin Flip qui fut bein aise d'm'ervais,
Ai quant à mé savous j'en eu une bain grande juaie.
J'nos promnîmes donv ensemble trejous dans l'Vier Marchi,
Quand tout d'un coup i'm dit: "Vé-tu v'là le bailli,
Le jeune homme qu'es ov li est iun des avocats,
Qu'est connétable étout dans une paraisse de bas."
I'se promenait coum' nous, ai j'entends en passant
Qu'i' n'pâlaient pon Jerriais, mais de l'anglais ronfliant,
Flip me dit qu' le Jerriais i'n'le comprenat pon
Pus qu'la langue d'ses ancêtres ai ch'etait le breton,
V'là qui m'douni un coup, j'en fus tout ebaubi......
V'ais d'itai à Jerri ch'est à en faire pitchi!

Aifants ne craignous pon la colère de vos pères
Cuochis paisiblement dans le tombé austère!
Crious qu'i sont contents de vais vos sacrilèges,
De vais tuos iun à iun passer les privilèges
Qu'i payaient de lus sang?
                                    Ai en viant d'itai
Crious que Jean Herault ai Hélie de Carteret
Peuvent dormi tranquillement dans la si fraide taire,
Aicoutaient-i plaiader dans la langue d'Angletaire,
Ou savais bain qu'Hélie le sabre à la main
Fît flanqui hors d'la Cour un gouvairneur hautain;
Henri Huit était juste; i nos douni raison,
Man gouvairneur s'en fut - pour muorri en prison,
Ai pis ocquo d'nos jours, le grand François Godfrey,
Ou savais s'i' voulait nos laissi angliaiser!
Demandais san clairque qu'est ocquo parmi nous,
S'i voudrait vais qu'angliais entre les dents de tous.
Ah! crüs bain chunclé, que tuos ches vrais Jerriais
Trembient de désespé; ai rain que de vos vais
Oublier lus cuorage, ai votre libertai,
Vos renient pour lus fils ai lus posteritai!
Mais i'n' faut pon qu'j' chairche à faire d'la discorde;
Mais j'n'ai pon pu me taire de paîne mon cheu daîborde.
Pensais à chûte parole de Jean Jacques Bousseau:
"I'n' faut pon j'ter, dit-i, la libertai à l'iau.
Ch'est une chose bain belle, qu'un peuple gagne une fais;
Mais, hélas, s'i' la paird, i'n' la rattrap' jamais."
En nos rapp'lant chouna, gardons tréjous nous druaits,
Maîme avec jalousie, ai en fidèles sujaits.
Défendons notr' Jerri contre les souverains,
Car i'n' faut pon changé; je soum, républicains,
Ai dans les jours de juaie, j'voudrais que tuos s'aîcrient:
"Vive Victoria, Duchesse en Normandie."

Amans libertatis Patriae
 

Viyiz étout:

 

Les Pages Jèrriaises