Les Pages Jèrriaises

L's embarras du Bouonhoumme Joe avec l'Eslectricitai


Les r'présentants d'la compagnie d'l'eslectricitai avais criai siez Joe, pour l'y d'mandai d'prendre l'eslectricitai siez li, et offridre dé l'y dounnai eun estimate pour l'y wirerai sa maison.

Y dounnirent eun prix à Joe, mais Joe et sa bouonnefemme dites qué ch'tai trop chi, et qui lus graierais avec lus lampes.

Coumme dits Joe; nous zerrai deux ou trais baris d'paraffine pour chu prix-là!

L'bouonhoumme Joe tait bein matina, et touos les matins il allait cherchi san lait siez san vaisin Douard.

Eun matin, Douard et Joe eurent eune conversation au sujet d'un grand nombre d'jeune gens qui sont bein tard a lus l'vai au matin.

Douard lis dits: Sans allai pus yien, y'a man fis et ma fille, in y'a pas moyen d'les faithe lévai au matin. Man garçon a tait m'nichi eune fais ou deux d'perdre sa job, par être tard a san travas, et ma fille aitou, ou sert dans eune boutique.

L'bouonhoumme Joe dits: J'soummes dans l'même piat tai et mai dont! Siez-nous l'Frank, in y'a pas moyen d'lé faithe stertai du yiet, j'ai desja d'pichi un bétchai du piafond dans la tchuisine a forche dé capuchi avec eun manche dé bringe pour lé faithe sé l'vé. Et la Annie, sa soeur; ma femme a les milles embrarras a la faithe sorti du yiet, oulle est tchique fais obyigis d'la traînai hors du yiet pour la faithe sé l'vai. J'ai dit a la bouonnefemme: "Rue li eune bouctais d'yieau sus yi, ou s'levra bein vite!" Mais coumme dit la bouonnefemme, j'errais tout chu linge-là a r'sitchi.

Enfin, eun matin, tchique temps après, Joe va ramassai san lait coumme d'amord, et trouvi siez Douard, lé garçon et la fille l'vais a siex heures et d'mie.

L'garçon, les manches ertroussais jusqu'au coutte, et la fille tchi paraissai bouogi.

Joe pensi: Hélas! tch'est qu'chonchin veur dithe? Mai Douard n'tai pas en veue.

Joe en r'venant avec san lait, vît lus houmme dé journais, eun farceux, qui tai en travas dans l'clios.

Joe lis dits: "Ou zavais yieu du changement siez tan boss!" Tch'est q'chounna veur dire. L'garçon et la fille son l'vais?

Ah vaithe s'fit l'gas. "Ch'est d'pis q'la maison a tai eslectrifiais!"

Joe q'mentchi a pensai. Quand y rentri siez li, y dits à sa bouonnefemme: "Ch'est siez Douard qui yia yieu du changement; a siex heures et d'mie l'garçon et la fille tais l'vais.

La bouonnefemme dits: "Yia yieu eun trembiément d'terre dont?" Yia yieu d'autre choses dits, Joe; j'ai d'mandai à l'houmme dé journais et y m'a dit qu'ch'est d'pis q'la maison a tai eslectrifiais. Si ch'est d'même, y vau la peine d'avai l'eslectricitai, si j'pouvaîmes sauvai la position a nos esfants! La bouonefemme en fût toute esmerveillis. Ou dits: "Joe, j'sis prête a vendre mes deux quartchiers dé froment, pour avait l'eslectricitai.

Après desjunai, Joe s'changi, prend la Bus et va a la compagnie d'leslectricitai, et lus d'mandi; si tais prêts a wirerai sa maison coumme y yien avais paslai. Y s'arrangirent dé prix et Joe signi.

Quand y tais a wirerai la maison siez Joe, sa soeur qu'a quatre-vingt-deux arrivi, et ou dits a Joe: "Tch'est qu'tuais en faisant man pouorre garçon?" Y sont a wirerai ma maison, s'fit Joe, j'nos znallons avai leslectricitai. Coumbein q'tu pasi pour chounna? - Vingt louis. - Vingt louis! s'fit sa soeur, tues fo dont Joe, man garçon? Si tu m'avais dit j'térais enseigni coumment t'y prendre, car tu pouvais accatai du wire et j'sais v'nue t'aidgi a wirerai. Man pouorre garçon, j'tai dit, tuest fo!

Joe dits: Y faut un wire spécial!

- Ah! man pouorre esfant, tu n'avait qu'a accatai eune douzaine dé verges d'bouon galvanized wire siez eun quinquayi, et trais douzaines dé cramponds, et avec eun marté et eune scie à t'non, et eun chisé, j'erraimes arrangi chounna pour mains d'trente chelins.

- Ma pouorre fille, tu n'sai pas tchesq'chest; si tu disais counna es siens d'la compagnie, y l'en rirais a en avait du ma.

Enfin la maison fut wirerais, et l'eslectricitai piaichie, et l'piafond ergrès.

Après huit jours, en Frank ni Annie rein n'avait changi, pas d'lévrie au matin.

Né v'la l'bouonhoumme Joe en m'sespé et sa bouonnefemme aitou.

Joe dits: J'menvais a la compagnie et y faut qui m'explique coumment q'chounna s'fait, qué siez Douard lus esfants s'lève au matin d'pis qui l'ont l'eslectricitai.

Joe s'enva a l'office de la compagnie et trouve lé Manager et deux clerks, et lus dits: Ou n'avais pas pietchi vos wires bein siez nous, ou zavais fait tchique bêtise. Et y lus explitchi coumment q'siez san vaisin lus esfants sé l'vais d'bouonne heuthe dépis quil avais leslectricitai, mais, siez li, rein n'avait changi.

L'Manager fut obyigi d'sen allait, et laissi les deux clerks, car y n'avait qué d'bostai d'rire. Bétôt, yeun des clerks n'en pouvait pus, et y s'nalli et laissi l'autre a s'desmêler avec lé bouonhoumme.

Le clerk, qui n'savait qué tchique mots d'français, dits à Joe: "Tu voudrais qué nou mette la eslectricité au yiet a ta fis, y brûlait li, et l'compagnie sait persécutai, et m'nai d'vant l'Cour.

Joe s'en fut en guédon, et en s'en rallant siez li, entri siez Douard, et lis dits; et lis d'mandi explication d'chounna.

Douard sé mins à rire, et lis dits: Man pouorre Joe, estche qué tuest si bête coumme chounna?

Joe lis dits: Escoute, t'n houmme dé journais m'dit qu'tan garçon et ta fille sé l'vais d'bouonne heuthe, et qué j'tai d'pis q'tuavais leslectricitai dans ta maison; et, si tu n'mé crai pas j'allons l'y d'mandai.

Man pouorre Joe, tu dai bein savait qué m'nhoumme dé journas ne'st qu'un farceux; et il explitchi a Joe la raison pourtchi q'san garçon et sa fille lus l'vais d'si bouonne heuthe ch'est matins-là. "Ch'est qué j'tais embarrassai avec mes tomates et jé n'pouvais pas trouvé d'monde, et j'dits à man garçon, sou voulais vos l'vait d'bouonne heuthe du matin a patchi mes tomates, j'tai dounnai a té Frank, eune motor bycke, et a tas soeur eun piano. V'lé l'ségret!"

Joe s'en fut siez li et dits tout a sa bouonnefemme et touos les deux lus mindre a pieurré a fraides lermes coumme des esfants.

Joe vint si pouorrement, q'y furent obyigis d'avait l'docteu, tchi dit q'Joe tait run-down et qui faudrai qu'il irai sai a Bagnole ou a Vichy, prendre les yieaux.

Frank et sa soeur Annie réalisirent la peint qui tais a faithe a lus parents, achteu y sont l'vais a siex heures du matin. Joe et sa bouonefemme sont d'charme, et ils ont l'eslectricita; y sont heureur coumme des princes.

J.M.

 

Viyiz étout:

 

Les Pages Jèrriaises