À ches drein nou dêvouailit l'emblième officiel du Jubilé d'Dgiamant d'la Reine, not' Duc, pouor l'année tchi veint. Lé portrait fut chouaîsi auprès eune compétition tchi fut gângnie par eune janne fil'ye. Y'a des difféthentes vèrsions du logo pouor des publyicâtions en couleurs et en nièr et blianc, et y'a des vèrsions en Angliais et en Gallouais - mais i' n'y'a pon d'vèrsion Jèrriaise. Tchi pitchi! Tout coumme i' n'y'a pon d'vèrsions dans d'aut's langues Britanniques. Où'est qu'est la vèrsion Êcôssaise, et l'Irlandaise, et la cheinne en Scots ou en Cornouaillais? Épis nou n'vait pon d'vèrsion Manx ouaithe qu'la Reine sait Lord dé Mann, coumme oulle est l'Duc siez nous.
V'là tch'est eune difféthence d'auve lé logo officiel Cannadgien du Jubilé. Au Cannada, l'logo est sans patholes et don ch'est bouon à faithe sèrvi auve toutes les langues - les deux langues officielles d'la fédéthâtion (l'Angliais et l'Français) et les langues officielles des provînces et les langues des Preunmié Nâtions.
Eune tchestchion: où'est qu'nou peut vaie l'emblième du Jubilé d'Argent d'la Reine, not' Duc, en Ville? Un amas d'monde lé pâssent touos les jours sans l'èrmèrtchi. Ch'est sus l'piédestal d'la Crouaix d'la Reine à la Pompe dé Bas. J'avons tchiques monuments ès Jubilés en Jèrri, car j'sommes èrnommés pouor not' louoyauté à la Couronne et not' rouoyalisme. Assa, tchi qui veurt pliaichi des statues d'nos politiciens?
La Crouaix d'la Reine vaut un mio d'êtude quand nou-s'a deux-trais minnutes d'êpaîngne car y'a des sŷmboles d'l'histouaithe et d'la tchultuthe dé Jèrri: eune canne à traithe, la teurque Celtique, un ormèr, la pouquelaye du Mont d'la Ville, la vielle prison, la fache dé Saint Hélyi.
La statue d'la Reine Victoria fut c'mandée pouor lé Jubilé d'Or en 1887 - mais ou fut r'tèrgie un mio. Épis pouor l'Jubilé d'Dgiamant d'1897, l'Av'nue Victoria fut nommée et la Couronne du Jubilé en grannit fut pliaichi au but d'l'Av'nue. Auprès toutes les statues stchulptées et mâtées pouor san Jubilé d'Or, la Reine Victoria avait d'mandé qu'nou n'en êrige d'aut' pouor l'chein d'Dgiamant, mais au run dé chenna, qu'nou faiche dé tchi d'bein publyi - et né v'là pouortchi qu'j'avons les Victoria Cottage Homes.
Y'a-t-i' par chance eune vèrsion Gallouaise pouor "Victoria Cottage Homes"?
Geraint Jennings
Viyiz étout: