Desiderata
Allez trantchilement, parmi l'brit et l'tîntamarre. Èrsouv'nous qué où'est qu'ou trouvethez l'silence ou trouvethez la trantchilité d'esprit. Séyiz en bouan rapport auve tout l'monde. Dites la véthite nette et cliai, et êcoutez chein qué l's autres ont à dithe, même les cheins tchi n'sont pon trop avisés, et l's innouothants, viyant tch'il' ont drouait à la pathole. N'hantez pon les pèrsonnes tch'ont trop d'becque et d'fortes idées. I' pouôrraient vouos adgéchi et vouos ennouorter à hèrtchingni.
N'faites pon d'compathaîsons entre vouos-mêmes et l's autres, car ou trouvethez tch'i' y'en a d'pus riches qué vous et ch'la vouos f'thait p't êt' oublier tch'i' y'en a d'pus pauvres étout! I' vaut mus vouos contenter d'gabouother drait dans l'êtat dans tchi l'Bouan Dgieu vouos a appelés; et séyiz voués à vouot' travas. I' pouôrrait tout à fait être eune bénédiction en temps pénibl'ye pour vouos aîdgi à faithe à mauvaise forteune bouan tchoeu. Tén'-ous sus vouos gardes en affaithes, car lé monde est pliein d'tritcheurs, mais i' n'faut qu'ch'la vouos empêchent dé r'connaître tch'i' y'a des braves gens et d'l'honnêteté dans l'monde étout. Séyiz naturels en vous-même et dans tout. Lé monde peuvent s'en appérchéver quand nou fait d'san tchian et nou peut tréjous r'connaître un moussieu d'fanmile.
Vieillissez grâcieusement et sans r'gret ni rantcheune. Nou n'peut pon arrêter la vieillithie, et en vieillissant nou-s-apprend d'l'avis.
Les gens tchi font tout à contre-tchoeu et tchi vont tréjous contre vent et mathée sé donnent souvent un tas d'gêne et d'craintes tchi sont înmaginnaithes. I' faut don vouos accouôteunmer à prendre lé bouan auve lé mauvais, mais i' faut faithe lé bein d'san bouan vouler et n'pon oublier qué l'Bouan Dgieu compte vouos r'vaie dans tchique jour. Armez vouot' esprit par la prièthe et la méditâtion pour pouver combattre autcheune peine ou avârie innattendue, et prenez l's êvénements d'la vie comme Lé Bouan Dgieu les donnent.
N'oubliez pon qu'ou-s-êtes ieune des criatuthes dé l'univèrs, et qué L'Criateu vouos a mîns sus la tèrre pour en profiter; ch'est en tchi ayiz fouai en Li et Ses plians pour vouot' bonheu êtèrnel. Ouaithe qu'ou n'est pon parfaite en toutes choses, et qué l'mauvais temps embête tchiquesfais l'tchultivateu d'ses clios, qu'la fraid est pénibl'ye pour les uns et la chaleu pour d'autres, et qu'la paix est dans les temps înterrompue par la dgèrre, i' faut avouer qu'la tèrre est eune belle et bouanne pliaiche à d'meuther d'dans. Ch'est en tchi séyiz contents d'vouot' sort à seule fîn qu'vouot' séjour dessus piêsse vouos apporter bonheu et contentement!
George d'la Forge
Desiderata
“N'séyiz pon tréjous en hâte et en prêsse pour tout faithe. Prannez la vie trantchil'ment, et l'temps comme lé Bouân Dgieu vouos l'donne. Autant comme il en est possibl'ye et raisonnabl'ye, séyiz en bouân rapport auve tout l'monde. N'éyiz pon d'peux d'faithe à saver vouot' véthitabl'ye pensée d'eune faichon fèrme et autoritouaithe s'ou-s-êtes seux d'vouot' coup, mais en mème temps i' faut êcouter chein qué l's aut' ont à dithe - mème les p'tits esprits et l's innouothants - car il' ont autant d'drouait à la pathole comme les cheins tch'ont d'fortes idées.
“Mêl'ous d'vouos affaithes, mais n'vouos mêlez pon parmi les bagouleurs et mauvaises langues, car i' gâtent les bouannes moeurs et dênigrent l'caractéthe. S'ou-s-êtes enclyîns à vouos compather auve d'aut' pèrsonnes, ou n'y trouvethez pon d'satisfaction, car i' y'en étha tréjous tchitch'uns pus avisés et d'aut' pus bêtes qué vous.
“Profitez des bouannes rêcompenses dé vouot' travas, et nouorrissez vouos ambitions. Séyiz contents - et mème ordgilleurs - dé la vocâtion tch'est vouot' gangne-pain. Quand mème qu' ou né s'sait p't êt' pon des pus fanmeuses ou distindgies, ou peut dév'nin eune vraie bénédiction dans ches temps changeants et încèrtains, et i' n'faut janmais oublier qu' ch'est la fîn tchi couronne l'oeuvre.
“Séyiz sus vouos gardes et mêfi'-ous en ch'tch'i' concèrne vouos transactions et entréprînses, car i' y'a un tas d'tritcheurs et d'malhonnêtes par les c'mîns. Mais i' n'faut pon oublier tch'i' y'a quand mème des braves gens tchi sont honnêtes et întégres et tchi peuvent vouos v'nîn en aigue en cas d'bésoin. Y'a acouo un tas d'héros dans l'monde.
“Séyiz pôsés et d'comport naturel. Ch'est pus aîsi d'êt' eune aut' pèrsonne, et i' n'faut pon oublier tch'i' y'a d'la bouânté dans l'monde tchi fait s'n appathence en temps et lieu quand nou crait qu' ch'est la mauvaîtchi tch'en gangne. Profitez d'l'exprérience dé la vie atchise par lé passage du temps, et n'vouos r'bînfrez pon contre l'arrivée d'la vieillèche, sachant tch'i' faut vivre vièrs ou mouothi jannes, mais laîssiz couorre - trantchil'ment, grâcieusement et sans rantcheune contre lé destîn - l's activités tch'appartchiennent à l'ênèrgie d'la jannèche. I' faut renforchi l'esprit par la priéthe et l'exèrcice spirituel qué la lectuthe et l'êtude des Saintes Êcrituthes vouos apportent, en fîn d'compte dé pouver lutter contre la probabilité êventuelle d'avâries et d'mînséthes tchelconques.
“I' n'faut pon vouos tracachi d'trop. Séyiz contents d'travailli honnêtement et sans pièrcheûser, et d'faithe vouot dévé 'dans l'état de vie auquel il a plu à Dieu de vous appeler', comme nouos l'dit l'Caticème dans la Litourgie d'l'Églyise, sachant qué si l'Bouân Dgieu soingne des flieurs et des bouais et d'toutes choses dans l'univèrs, I' souangn'na d'autant pus d'Ses êfants tch'I' l'aiment. Séyiz don en paix dans l'asseûthance dé S'n amour, un amour tchi dêpasse tout entendement, et en mème temps gardez vouot' esprit calme et un harmonie auve vouot' vaîsîn, car chutte tèrre est belle et av'nante et la vie vaut la peine de vivre dans l'bonheur du bein-être.”
George d'la Forge
Desiderata
Va paisibliément parmi l'camas et la prêsse, ramémouaithe-té combein d'paix qu'i' peut y'aver sans brit. Autant qu'pôssibl'ye, sans s'èrnier, sai en t'nanche auve châtchun. Pâle ta véthité trantchil'yement et cliaithement, et êcoute les aut's, même les dolents et îngnots; il' ont ieux étout d'tchi à raconter. Cârre-té d'pèrsonnes briteûthes et batilieûthes; v'là tchi gêne l'esprit. S'tu t'compathe d'auve les aut's, tu pouôrrais dév'nîn ordgilleux et amièrti, viyant qu'i' y'étha tréjous tchiqu's'uns pus grands et pus p'tits qu'té. Rêjouis-té d'tes succès aussi bein qu'tes plians. Reste întérêssi dans ta carriéthe à té, n'împorte combein humbl'ye qu'ou sait; oulle est vraînment bein à posséder coumme les temps et forteunes lus changent. Sai précaûcieux dans tan démnîn, ch'est en tchi l'monde est remplyi d'triqu'thie. Mais qu'chennechîn n't'aveugl'ye pon à combein qu'i' y'a d'vèrtu; y'a bein du monde tchi lus êcanchent à des hautes prîncipes, et partout y'a des héros dans la vie. Sai té-même. Sustout n'fausse pon l'affection. N'sai pon nitout ouaînâtre entouor l'amour, ch'est en tchi enfachi d'toute sicrèche et tout r'ta, i' r'craît tréjous coumme l'hèrbe. Èrchai aimabliément l'avis d's années, en r'nonchant grâcieûthement les choses d'la jannèche. Nouôrris la forche d'esprit à seule fîn d'faithe contre malforteune bouôn tchoeu. Mais n'té badre pon l'esprit auve la brélue nièrchie. Y'a bein des craintes tchi sont nées d'la lâss'sie et d'la solitude. Par dessus d'la disciplyinne saine, sai doux auve té-même. Tu'es un êfant d'l'unnivèrs dé même qu'les bouais et l's êtailes; tu'as l'drouait d'êt' ichîn. Et si chenna t'est cliai ou nânnîn, l'unnivèrs sans doute sé dêvouaile coumme i' dévthait. Sai don à la paix auve lé Bouôn Dgieu, n'împorte coumme tchi qu'tu l'înmaginne. Et n'împorte tch'est qu'i' sont tes travaux et aspithâtions, dans l'tchèrnage dé la vie, garde la paix dans l'âme. Auve touos ses embliûtréthies, tueûthies, et rêves bûchis, lé monde est acouo bé. Sai tchoeuthu. Êcanche-té à êt' heutheux.
Geraint Jennings
traduit d'l'Angliais d'Max Ehrmann
Viyiz étout: