Les Pages Jèrriaises

Desiderata

Allez trantchilement, parmi l'brit et l'tîntamarre. Èrsouv'nous qué où'est qu'ou trouvethez l'silence ou trouvethez la trantchilité d'esprit. Séyiz en bouan rapport auve tout l'monde. Dites la véthite nette et cliai, et êcoutez chein qué l's autres ont à dithe, même les cheins tchi n'sont pon trop avisés, et l's innouothants, viyant tch'il' ont drouait à la pathole. N'hantez pon les pèrsonnes tch'ont trop d'becque et d'fortes idées. I' pouôrraient vouos adgéchi et vouos ennouorter à hèrtchingni.

N'faites pon d'compathaîsons entre vouos-mêmes et l's autres, car ou trouvethez tch'i' y'en a d'pus riches qué vous et ch'la vouos f'thait p't êt' oublier tch'i' y'en a d'pus pauvres étout! I' vaut mus vouos contenter d'gabouother drait dans l'êtat dans tchi l'Bouan Dgieu vouos a appelés; et séyiz voués à vouot' travas. I' pouôrrait tout à fait être eune bénédiction en temps pénibl'ye pour vouos aîdgi à faithe à mauvaise forteune bouan tchoeu. Tén'-ous sus vouos gardes en affaithes, car lé monde est pliein d'tritcheurs, mais i' n'faut qu'ch'la vouos empêchent dé r'connaître tch'i' y'a des braves gens et d'l'honnêteté dans l'monde étout. Séyiz naturels en vous-même et dans tout. Lé monde peuvent s'en appérchéver quand nou fait d'san tchian et nou peut tréjous r'connaître un moussieu d'fanmile.

Vieillissez grâcieusement et sans r'gret ni rantcheune. Nou n'peut pon arrêter la vieillithie, et en vieillissant nou-s-apprend d'l'avis.

Les gens tchi font tout à contre-tchoeu et tchi vont tréjous contre vent et mathée sé donnent souvent un tas d'gêne et d'craintes tchi sont înmaginnaithes. I' faut don vouos accouôteunmer à prendre lé bouan auve lé mauvais, mais i' faut faithe lé bein d'san bouan vouler et n'pon oublier qué l'Bouan Dgieu compte vouos r'vaie dans tchique jour. Armez vouot' esprit par la prièthe et la méditâtion pour pouver combattre autcheune peine ou avârie innattendue, et prenez l's êvénements d'la vie comme Lé Bouan Dgieu les donnent.

N'oubliez pon qu'ou-s-êtes ieune des criatuthes dé l'univèrs, et qué L'Criateu vouos a mîns sus la tèrre pour en profiter; ch'est en tchi ayiz fouai en Li et Ses plians pour vouot' bonheu êtèrnel. Ouaithe qu'ou n'est pon parfaite en toutes choses, et qué l'mauvais temps embête tchiquesfais l'tchultivateu d'ses clios, qu'la fraid est pénibl'ye pour les uns et la chaleu pour d'autres, et qu'la paix est dans les temps înterrompue par la dgèrre, i' faut avouer qu'la tèrre est eune belle et bouanne pliaiche à d'meuther d'dans. Ch'est en tchi séyiz contents d'vouot' sort à seule fîn qu'vouot' séjour dessus piêsse vouos apporter bonheu et contentement!

George d'la Forge

traduit d'l'Angliais d'Max Ehrmann

 

Viyiz étout:

 

Les Pages Jèrriaises