San Antonio, Texas,
U.S.A.
Lé 24 janvyi, 1970.
Moussieu l'Rédacteu,
La s'maine passée j'mé pliaingnais du brit qu'nou ouait par les c'mîns. I' n'faut tout d'mème pon qué j'm'accouôteunme à m'pliaindre - mème en pensant qu'un bouan pliaingnant peut vivre chent ans! I' pathaît tch'i' y'en a ieu d'touos temps! J'liêsais l'aut' jour qué les gens s'pliaingnaient du brit et d'la vitesse dé la vie ichîn en Améthique en l'année mil siex chent nénante-deux, appréchant d'trais chents ans dans l'passé! J'mé d'mande tch'est tchi'i' pouvait y'aver à faithe du brit dans ches vièrs temps-là quand i' n'y avait pon d'motos ni d'avions, ni d'radios ni d'télévision.
Un vièr diton Jèrriais nouos dit tch'i' y'a des r'mièdes pour touos les maux, et l'articl'ye qué j'liêsais en donnait pour lé brit d'l'êpoque dé tchi j'vouos pâle. Dans l'églyise dé St. Paul, dans la ville lé Baltimore, Êtat d'Maryland, il' ont trouvé d'l'êcrituthe sus eune tablette monumentale tchi dit:-
Allez trantchilement parmi l'brit et l'tîntamarre. Èrsouv'nous qué où'est qu'ou trouvethez l'silence ou trouvethez la trantchillité d'l'esprit. Séyiz en bouan rapport auve tout l'monde. Dites la véthité nette et cliai, et êcoutez chein qué l's autres ont à dithe, mème les cheins tchi n'sont pon trop avisés, et l's innouothants, viyant tch'il' ont drouait à la pathole. N'hantez pon les pèrsonnes tch'ont trop d'becque et d'fortes idées. I' pouôrraient vouos adgéchi et vouos ennouorter à hèrtchingni.
N'faîtes pon d'compathaîsons entre vouos-mèmes et l's autres, car ou trouvethez tch'i' y'en a d'pus riches qué vous et ch'la vouos f'thait p't êt' oublier tch'i' y'en a d'pus pauvres étout! I' vaut mus vouos contenter d'gabouother drait dans l'êtat dans tchi L'Bouan Dgieu vouos a appelés; et séyiz voués à vouot' travas. I' pouôrrais tout à fait bein être eune bénédiction en temps pénibl'ye pour vouos aîdgi à faithe à mauvaise forteune bouan tchoeu. Tén'-ous sus vouos gardes en affaithes, car lé monde est pliein d'tritcheurs, mais i' n'faut pon qu'ch'la vouos empêchent dé r'connaître tch'i' y'a des braves gens et d'l'honnêteté dans l'monde étout. Séyiz naturels en vous-mème et dans tout. Lé monde peuvent s'en appèrchéver quand nou fait d'san tchian, et nou peut tréjous r'connaître un moussieu d'fanmile.
Vieillissez grâcieusement et sans r'gret ni rantcheune. Nou n'peut pon arrêter la vieillithie, et en vieillissant nou-s-apprend d'l'avis.
Les gens tchi font tout à contre-tchoeu et tchi vont tréjous contre vent et mathée sé donnent souvent un tas d'gêne et d'craintes tchi sont inmaginnaithes. I' faut don vouos accouôteunmer à prendre lé bouan auve lé mauvais, mais i' faut faithe lé mauvais, mais i' faut faithe lé bein d'san bouan vouler et n'pon oublier qué L'Bouan Dgieu compte vouos r'vaie dans tchique jour. Armez vouot' esprit par la prièthe et la méditâtion pour pouver combattre autcheune peine ou avârie innattendue, et prenez l's évènements d'la vie comme Lé Bouan Dgieu les donnent.
N'oubliez pon qu'ou-s'êtes ieune des criatuthes dé l'univèrs, et qué L'Criateu vouos a mîns sus la tèrre pour en profiter; ch'est en tchi ayiz fouai en Li et Ses plians pour vouot' bonheu êtèrnel. Ouaithe qu'ou n'est pon parfaite en toutes choses, et qué l'mauvais temps embête tchiquesfais l'tchultivateu d'ses clios, qu'la fraid est pénibl'ye pour les uns et la chaleu pour d'autres, et qu'la paix est dans des temps înterrompue par la dgèrre, i' faut avouer qu'la tèrre est eune belle et bouanne pliaiche à d'meuther d'dans. Ch'est en tchi séyiz contents d'vouot' sort à seule fin qu'vouot' séjour dessus piêsse vouos apporter bonheu et contentement!
J'n'ai autcheune idée d'l'identité ou du nom d'la pèrsonne tch'êcrivit ches mots-là en mil siex chent nénante-deux, mais, à m'n idée, i' f'thaient un mangnifique sèrmon meme aujourd'aniet, et i' prouvent qué pour cèrtaines gens, la trantchillité d'la vie, ouaithe qu'ou n'tait pon si disteurbée dans chu temps-là comme ou y'est a ch't heu, 'tait eune bénédiction tchi valait la peine d'aver!
J'l'ai connue en Jèrri, la trantchillité d'la vie, y'a eune septantaine d'années, et j'vai la difféthence entre ch't êpoque-là et à ch't heu quand j'y r'vais dans l'êté. Dans la salle du Ménage ès Feuvres y a un portrait du Vièr Marchi comme i' pathaîssait en 1630. La crouaix du Marchi 'tait en pliaiche dans chu temps-là, et La Cohue Rouoyale 'tait bein pus p'tite qu'ou n'l'est d'nouos jours, et les maîsons à l'entou 'taient p'tites et couvèrtes en glyi. I' n'y a qu'l'églyise de la ville tch'est à bein près comme oulle est à ch't heu sénon qu'oulle avait un cadran sus l'cliochi à la pliaiche dé l'hôlouoge. Combein d'fais qué j'mé sis mâté à r'garder chu portrait-là en pensant à mé-meme Tch'est qu'jé n'donn'nais pon pour pouver m'èrtchuler dans ch't année-là pour vaie Jèrri comme il 'tait dans les touos vièrs temps!
George d'La Forge
Viyiz étout: