Les Pages Jèrriaises

Jêrri


Il y-a des gens qui sembllent craire
Que che n'est rein qu'le ptit Jerri;
Qui n'y trouvent rein à lus pllaire,
Mais bein de qui a mesprisi:
N' faut pas qu'ils aient grand connaissance
Les cheins qu'nou ouait conter d'itai;
Mal pâler du llieu d' sa naissance
Est et sera tréjous bein laid.

J'ai veu l' Angleterre et la France,
L'Italie, la Suisse et ses monts;
Qui qu'nouz en aise et qu'nouz en pense,
J'aim mux Jerri et ses vallons:
Nou pâle de lacs et de montangnes,
Nou pâle de vingne et d'orangiers;
Rein n'est pus bé que nouos campangnes,
Rein n'est pus bé que nouos pommiers.

Qu'est-che qu'une orange aupres des pommes?
Qu'est-che qu'un lac aupres d'la mer? .
Je sommes bein comme je sommes,
J'n'avons vrainment rein à envier:
J'n'avons pas d'craie mais de bouanne terre
Pas d'riviere et d'inondations,
Que nouz ait la paix ou la guerre ,
Je souffrons mains qu'les grands nations.

N' y-a pon caleu ni d'fredure
A comparer es grands pays;
Le pus rude hiver nou l'endure,
Et l'êtè nou n'est pon havis:
Les biaux vallons de qui nou dvise,
Les gardins, côtis et russiaux,
Tout jusqu'à la pour' vieille église,
Me paraissent tréjous pus biaux.

L'Cidre est un excellent breuvage
S'il est de bouanne qualitè;
Si nou le fait d'un bouan pommage, .
S'il est etou bein apprêtè:
J'ai oui qu'un Ministre d'campangne,
Pus avisè que cheux qu'j'avons,
Faisait passer pour du champangne
De fameux prè de sa faichon.

A prendre Jerri tout ensemblle,
Souos tout le touannant du solèi
I'n'y-a pas de pllaiche qui m'semblle
Préférablle d'aucun côtè:
St. Louorains, ma vieille pâraisse,
Tu m'pllais pus qu'nulle autre en Jêrri,
De men cœur tu reste maitresse
Je t'aimerai jusqu'au drain soupi.

UN ST.-LOUORENCHAIS.

 

Vèrsion modèrnîsée:

Jèrri


I' y'a des gens tchi sembl'yent craithe
Qué ché n'est rein qu'lé p'tit Jèrri;
Qu'i' n'y trouvent rein à lus pliaithe,
Mais bein dé tchi à mêprisi:
N'faut pas qu'il' aient grande connaîssance,
Les cheins qu'nou ouait conter d'ité;
Mal pâler du lieu d'sa naîssance
Est et es'sa tréjous bein laid.

J'ai veu l'Angliétèrre et la France,
L'Italie, la Suisse et ses monts;
Tchi qu'nou-s'en aise et qu'nou-s'en pense,
J'aime mus Jèrri et ses vallons:
Nou pâle dé lacs et dé montangnes,
Nou pâle dé vîngne et d'orangièrs;
Rein n'est pus bé qué nouos campangnes,
Rein n'est pus bé qué nouos pommièrs.

Tch'est-che qu'eune orange auprès des pommes?
Tch'est-ché qu'un lac auprès d'la mé?
Jé sommes bein comme jé sommes,
J'n'avons vraînment rein à envier:
J'n'avons pas d'craie mais dé bouanne tèrre,
Pas d'riviéthe et d'înnondâtions,
Qué nou-s'ait la paix ou la dgèrre,
Jé souffrons mains qu'les grandes nâtions.

N'y'a pon caleu ni d'fréduthe
À compather ès grands pays;
Lé pus rude hivé, nou l'enduthe,
Et l'êté nou n'est pon hâvis:
Les bieaux vallons dé tchi nou d'vise,
Les gardîns, côtis et russieaux,
Tout jusqu'à la pouôrre vielle églyise,
Mé pathaîssent tréjous pus bieaux.

L'Cidre est un excellent brévage
S'il est de bouanne qualité;
Si nou lé fait d'un bouan pommage,
S'il est étout bein apprêté:
J'ai ouï qu'un Minnistre d'campangne,
Pus avisé qué cheux qu'j'avons,
Faisait pâsser pouor du champangne
Dé fanmeux p'ré dé sa faichon.

À prendre Jèrri tout ensembl'ye,
Souos tout lé touannant du solé,
I' n'y'a pas dé pliaiche tchi m'sembl'ye
Préféthabl'ye d'autchun côté:
St. Louothains, ma vielle pâraisse,
Tu m'pliais pus qu'nulle autre en Jèrri,
Dé men tchoeu tu reste maitrêsse
Jé t'aim'thai jusqu'au drein soupi.

 

Viyiz étout:

 

Les Pages Jèrriaises