|
Le prumi de la Cour Royale Est Mousieu Hammond not' Bailli; Sa barbe blanche est sans egale, Et sen saver n'est pas failli. I' peut vouos dviser pour une heure Sans en être lassé un brin; Sa langue est comme une ecloteure Qui laisse couore l'iau sans fin. Le seigneur de la Seigneurie De St. Germain, Mousieu Bisson, Se rpose à la fin de sa vie, Des conteurs i' n'entend pus l'son. Il a trejous 'té prêt à faire Sen dver en fidele sujet, Et pour le chein qui sait li plaire Il est tout remplli de bonté. François Marett un fils d'Avranche, Comme le Bailli, prend du sno; Nouz aime sa maniere franche; Il est bon et aime un bouon mot. Le prechain est Mousieu du Heaume Dont i' vaut mux ne dire rein, Sinon que de rcorder sen siaume Qu'il a un divers tas de bein. I' n'se creit pas de la ptite biere Et il est un ptit roupilleux; Chacun peut veir à sa maniere S'il est humble ou bein orguilleux. Pour continuer le quatrieme Est le juge Charles Gruchy; Maugré ses rhomatiss il aime Le travas quand il y-est pllaichi: Ch'est dommage que l'rhomatisse L'obllige ainchin de hampionner; Nouz aimrait à vei a justice Marchir tout drait sans clopiner. A côté d'li chacun admire La figure d'Mousieu Picot, J'ai bein du pllaisir à le dire, Sa veue est quasi un fricot. Opres li veint le juge Falle, Il est le drain de sen côté, Personne mux que li n'etale Sen honneur et sa dignit Il a une barbe imposante, Ch'n'est certes pas un cherubin, Sa mine est assez innocente, Ouess-que consideré malin. Et pis en cmanchant par la drouaite Nou trouve le juge Briard De la louai fidele interprete Homme sans morgache et sans fard. J'n'en connais as un pus fidele Parmi nous à faire sen dver; D'exactitude un vrai modele, Pus de iun devrait l'imiter. Le prechain est un homme dingne De tout honneu, Mousieu Mouorant, Un homme tout à fait hors ligne, Des magistrats est l'ornement. En continuant la compagnie Nouz arrive au docteu Langleis, I' semblle parfais qu'i' s'engnie D'ouir les mêmes propos tant d'feis, Ch'n'est pas un mauvais caractere, I' n'cherche pas dispute ou brit, Mais i' peut se mettre en colere, I' n'faut pas li piler sus l'pid. Quant à Mousieu Clement Nicolle, Et sen vaisin Mousieu d'Gruchy I' n'sont pas des garçons d'ecole Dpis longtemps i' savent marchi. Enfin pour finir la douzaine J'en ai ocouo iun à nommer, Elie Nicolle d'la Fontaine Qu'était député quand et me. L'prechain a nommer est un homme Qui-a de l'esprit assez pour deux; J'n'en connais pas un autre comme R.P.Marett le procureux. Opres li veint Mousieu l'Vicomte, Gervaise Le Gros est sen nom, Qui les difficultés surmonte, Esprit calme, juste et profond. Chute année a 'té ermerquable Par la mort de deux Avocats D'la Reine, chose regrettable Et à ch't-heu je n'en avons pas. Le Greffi Vernon jeane drôle A hardi de capacité; I' sait fort bein rempllir sen rôle. Je l'dis et ch'est la vérité. Les avocats à longue haleine, Es sergents et les ecrivains M'amenent au but de ma peine Ov l'huissier qu'est le tout fins mains.
P.L. |
Viyiz étout: