J'sommes dans l'parleux à Sophie. Eune vaque n'y r'connaît'tait pas san viau tel qu-i' y a tant d'banniéthes et d'couleurs en blianc et rouoge - les couleurs dé l'Angliéterre - et Sophie est a r'garder un vidéo sus la télé car oulle est à êtudier toutes les êtchipes qu'ont joué.
Sophie:- Angliéterre! Angliéterre! Pâsse Lampard, achocre! Pâsse à David! Ah, Magnifique, David! Wayne!, oh Wayne!, mêfie-té! Tan p'tit orté, tan p'tit pid! Ronaldo est driéthe-té! Oo! Les Portundgais ont la balle! Bouan garçon Rio, pâsse à Ashley! Pouorre bête, il a perdu la balle! Ou 'rgarde sa montre. Rein qu'deux minnutes dé la preunmiéthe maintchi dé restant! John Terry, bouan gas, pâsse, pâsse!
A chu moment-là Jane entre chèrgie d'pagas et d'albums dé photos.
Jane:- Es-tu là Sophie? I' y a t'i' tchique-chôse dé ma? J'ai 'té à tapper à la porte et tout ch' qué j'ouïais ch'tait té qui faisait des heurles! As-tu ma tchiquebord?
Sophie:- Shhh! Tais-té don! I' s'en vont finni dans eune minnute! Angliéterre! Angliéterre! La! lé "ref" a sûfflié. Ou s'touonne à Jane.Tch'est qu' tu as, don? Tu n'peu rester qué tchinze minnutes car i' s'en vont èrc'menchi la gamme! Assieds-té, don. Jé n'faisons pas d'teurs ichîn!
Jane clièrgie lé fourbi dé sus eune tchaise et s'assied.
Jane:- Tchinze minnutes! Est-tu folle? Tu es a 'rgarder un vidéo tchi fut joué au mais d'Juin! Et, èr-gas-mé chutte cotte-à-couochons ichin! Jane pâsse sa main sus la tabl'ye qu'est plienne dé ponsi! Tu n'as pas seulement netti dépis la football! Et nos v'chin au mais d'Novembre!!
Sophie: J'n'ai pas ieu l'temps! Vais-tu, j'voulais tant aller vaie la football en Allemangne, mais je n'pouvais pas l'afforder, ch'est pour tchi, j'fis des tas d'compétitions en espéthant dé gangni des titchets - et j'fus jusqu'à siez "Honnête Nev" mais, j'n'en ouï rein!
Jane:- Pitchi des sous à la route chenna! Tu éthais deu sauver tes sous pour la coupe du Monde en deux mille dgix!
Sophie:- Ch'est pour chenna qué j'sis à êtudier la forme dé toutes les êtchipes et j'pouorrais p't'être d'viner tch'est qui s'en va gangni et tu pourras v'nin avec mé, si tu veurt!
Jane:- Damne, nânnîn mercie, j'ai des milleurs chôses à faithe avec man temps! Jane ramâsse ses patchets et les albums. J'sis si ordgilleuse! J'sis eune grand'méthe! Un p'tit garçon! Neuf livres! Né hier. Ils ont nommé Hedley Ph'lippe lé chinquième!
Sophie:- Pas David Wayne? Ch'est un nom dêmodé, chenna!
Jane:- Lé janne Hedley voulait garder la tradition dé la fanmille! Mais, arrête qué j'té montre les photos - et l'habits qué j'avons pour lé p'tchiot! Jane ouvre lé livre dé photos. Ch'est li - dès qu'i' fut né! Et avec sa méthe et san péthe! Et lé v'chin TOUT NU!
Sophie:- (à l'audienche) Ooo! Tchi hardi biau garçon!
Jane:- I' r'sembl'ye à san P'pée coumme deux d'gouts d'ieau!
Sophie: ( à l'audienche) Pouorre mousse, lé janne Hedley n'est pas bé comme David Beckham!
Jane:- Et, èrgarde, Sophie, tch'est qu' j'ai acaté pour li! ou dêhalle un "babygro" et nou ouait tapper à la porte et eune lettre et des tas d'publicité tchait dans l'parleux!
Sophie:- Né prends pas d'avis à tout chenna, Jane, ch'est tout d'la publicité, montre-mé tes photos, j'sis si envieuse dé té!
Jane:- Mais Sophie, i' y a eune lettre sus l'haut, ch'est p'têtre important.
Ou s'lève et s'en va cherchi la lettre et la donne à Sophie.
Sophie:- Nannîn - ouvre-la. Ch'est acouo tchiques-uns qui veulent des sous, j'crais bein!
Jane ouvre la lettre et s'met a liéthe. Lé 30 dé Juin, deux mil six. Promotions dé Titchets pour la Coupe du Monde, Londres. Ma chiéthe Missis, Mille félicitations d'aver entré not' compétition. Ous avez 'té jugie d'aver fait la milleuthe entrée et ous avez gangni deux titchets pour la derniéthe gamme en Allemangne, trais jours dans un hôtel dé chinq êtailes et mille louis pour vos dêpends. Ecrivez à l'addresse au haut d'la lettre et j'vos attendons avec grand pliaisi. Si, par malheu, j'n'entendons rein d'vous par lé 3 d'juillet, lé prix es'sa donné au deuxième dé nos gagnants. Acouo eune fais, félicitations, Moussieu U. N. Pliaisi, Directeux. Oh, Sophie!!
Sophie s'met a faithe des heurles.
Sophie:- Oh Jane, j'avais gagni. Éyoù qué la lettre a 'té? J'veurs mouothi! Deux titchets et touos chès sous-la! J'm'en vais mouothi!
Jane:- J'ai grand r'gret, Sophie, mais si la Poste ont perdu ta lettre, tu devrais aver d'la RECOMPENSE! Oui, i' t'faut un homme d'affaithes!
Sophie:- Mais j'n'en ai pas ieun! D'la RECOMPENSE, crais-tu?
Jane:- Va vais l'mein. Il est hardi bouan, lé janne Hubert Fripon dé Fripon et Voleux, sus l'Esplanade. Il est seux dé t'gangni des milles Louis dé rêcompense.
Sophie:- Et j'pourrais aller vais la coupe de deux mille dgix avec mes sous, tu crais? Tu es si intelligente, Jane.
Jane:- Et bein, mets tes bouans habits et j'allons aller cherchi ta RECOMPENSE!!
Sophie:- Angliéterre pour la Coupe du Monde Deux Mil Dgix!!
par J. T.
Octobre 2006
Viyiz étout: