Les Pages Jèrriaises

Eune compétition pouor la millième page!

 

J'avons un gângnant! La compétition fut gângnie par l'Docteu Ralph Nichols tchi êcrivit un texte entouor sa r'traite, Jèrri et l'Jèrriais.

Ou pouvez liéthe "Ma R'traite" - la millième page ichîn sus les Pages Jèrriaises.

L'Docteu Nichols fut présenté auve la boutelle dé Calvados (acatée en Nouormandie continentale spécialement) à la rêunion d'la Section d'la langue Jèrriaise d'la Société Jersiaise au mais d'Octobre 1999.

Mais i' n'faut pon gângni eune compétition pouor vaie vot' articl'ye, poème, gamme ou au' chose en Jèrriais sus ches pages-chîn. Ah, nannîn! Comme tréjous, ch'est un pliaîsi pouor nous d'ajouôter autcheune chose à ches pages - mais ch'n'est pon châque fais qu'nou donne eune boutelle dé Calvados!

 

L'Docteu Nichols
L'Docteu Nichols fut présenté auve la boutelle dé Calvados

 

La vielle annonce d'la compétition

Les Pages Jèrriaises sus l'Ithangnie s'en vont bétôt ajouôter la millième page. Mais tch'est qu'ou s'sa, chutte page? Nou-s-a dêcidé d'offri l'honneu d'la millième page au gângnant d'eune compétition. I' y'étha un prix pouor lé chein tchi nos donne la miyeu page: ch'na pouôrrait êt' autcheune chose - eune histouaithe, eune articl'ye, un poème, un quiz, eune gamme, des portraits, des photos, des sons, même tchique p'tit programme en javascript (pouor les pus brantchis!), ou bein tchiquechose dé difféthent. Les textes peuvent êt' longs ou courts, séthieurs ou rîsibl'yes, sus autchun sujet, mais i' daivent êt' êcrits en Jèrriais!

 

Env'yez vot' page ou vot' texte au maître-pêtre des Pages Jèrriaises: Geraint Jennings siez geraint@societe-jersiaise.org avant la fîn d'Août 1999. Toutes les pages èrchues es'sont publiées sus les Pages Jèrriaises et lé gângnant èrchév'tha eune boutelle dé Calvados (ou l'êtchivalent en sou, s'ou voulez) pouor cêlébrer lé Millennium et l'pliaîsi d'vaie sa page publiée comme la millième!

(Contactez lé maître-pêtre, s'ous avez des tchestchions)

Bouonne chance!

 

Viyiz étout:

 

Les Pages Jèrriaises