Les Pages Jèrriaises

Une pétite tappe sus l'nez à Coclico

Ah! mais tout d'même, chest-i honteux,
D'entendr' bragui un valet d'même:
Sans honte, ni respé, ni sans peux,
S'vanter d'avé volaï d'la crème.
Qu'èje 'voudrais être Missis Billo!
Chès mé qui l'mettrais à la porte,
Jé l'renviethzais au dou d'Pytho,
A bèthze dé yiau - en r'vais d'sa sorte.

Hélas! lé monde est chans d'sus d'sous!
Des simples valets faithze des creux
Pour écouter ch'kiss dit en-d'sous,
Et pis sé vanter, - vaillant, preux!!
Mais n'ya pas d'soin, chès pas d'annyiet
“Qu'ècoute pathzai - jamais n'ouè dreit,”
Et j'voudrais bain qu'il su entendre
D'la véthzitai qui sçai pas tendre.

Pouore Miss Rondin! ou faites donc bain,
Deune pon vos laissi abafouer
Par un gros gourmand - abatpain,
Qui voudrait siés vous goulaler.
Qui s'fait brébis le loup le mange,
Prénais bouan soin denne pas céder,
T'nous bon sus l'vôtre - faut pas s'faithze ange
Il n'y en a pon - pas par ichin!

Laissis Missis Billo en r'pos;
Ou n'êtes pas digne dé la noummer,
Oull' est bain trop bouanne pour des sots
Qu'in sont “Ex-pert” qu'à mal pâlé....
Pour l'Anmin Flip, chest un gaillard
Qui peut bain se d'fendre au besoin;
Et s'erbimfrer contre un braillard
Le slingui - li faithze sa leçon.

 

La Défendresse

1889

 

Viyiz étout:

 

Les Pages Jèrriaises