Et r'garde don, ma pouor' Nenné,
Ne vait-tu pon que chut avé
Renversera sa bollaïe d'soupe!
Ah! mon doux. Oupe!
La v'là, ma fé, bein estrueillaie. -
Ah! chu malprope:
Chu p'tit salope!
I mérit'rai un' bouonn' fouotaïe.

II

V'là don un bieau net doublii;
Et son calobre est tout graissi;
Nous n'gagne rein de li en mettre un autre,
Chu sale apôtre;
Mêm' son p'tit fro en est tout mucre. -
Essuie ses yeux,
Il a ieu peux:
Donn' li, ma fille, un lopyn d'schucre.

III

Las! las! mon doux, mon doux, Nenné,
Ne v'lo-t-i' pon ov' un couté?
Assaïz pour se fair' ma es daits:
I n'y a pon d'paix,
Devrai, ov' ieux. Le v'là tchi brait.
Tchi cris piteurs!
Tchi lermes et plieurs!
I sembl' qu'nou l'tue, chu p'tit portraït.

IV

Le v'là-t-i pon auprès du feu?
Ah! combein d'fais tchi m'faït trimeu.
Ov' li i n'y a ni but, ni fyn.
Vein-t'en ichyn;
Assieds-te là comme un bouon p'tit,
(Chu p'tit chéri!)
Là, restez-y:
Maman t'fouett'ra s'ou t'vait bouogi.

V

Un moment d'paix tréjous achteu,
Et nou l'prends bein... Mon doux, chu feu!
R'garde d'sus, ma pouor' Nenné. -
J'crai tch'il a sai:
S'tu li donnais une goutte à bethe,
Il en s'ra d'mus. -
Ecout', j'ouai l'hus;
Ch'est p't-estr' Mollé, ou bein son pethe.

VI

Chutt' bouonn' fais là, je n'en veux pus. -
Mollé, beurge-nous bein vit' l'hus;
I veint les sept vents sus mon co. -
Ov' chu marmot
I n'y a d'r'pos ni niet, ni jeu.
Ah! ou n'sait guethe,
Tchi n'est pon methe.
Nou s'rait bein mus à son tout seu.

VII

Et ou-est donc tu'es, ma pouor' Nenné?
Veint vit', j't'en prie, pour le happé,
Car pour de mai je n'peux bouogi,
Et va l'couochi:
Ov' li nou n'fait goutt' de bouon sang. -
Ah, pour une fais,
Me v'là en paix!
Et j'voth enshaille, il en est temps.

A.A.L.G.