Les Pages Jèrriaises

Ch'est chein que j'n'avons pas...


J'avons sus notr' compteux, à la Nouvelle Chronique,
Pour que touos les Jerriais piessent v'nin les admither
Deux-trais échantillons de produits magnifiques,
Qui montrent que nos fermièrs savent bein coumment fermer.

Y'a des coucombres, j'vos l'dit, qui sont vraiment r'mèrquabl'yes,
Ch'n'est pas l'poummé d'ma gambe qu'apprèche de lu grosseu',
Des patates coumme ma tête, ch'est tchique chose d'incriyabl'ye!
Mais ch'est chein qu'i' n'y a pas qui m'fait l'pus mal au tchoeu.

***********

Quand j'avons des gradilles, des pommes et des tomates,
Des frâses, des figues, des prunes, nou peut occouo s'y r'faithe...
Mais tch'est qu'un “Personnel” peut faithe ov des patates,
Des coucombres, des panais, - sans aigre et sans chaudiéthe?

Si tchic vièr campagnard 'tait bon d'aver pitchi,
Et d'apporter ichin, un d'mié bouossé d'châtaignes,
Un caboté d'bouans mêles ou d'nouais - ches'sait occouo là d'tchi!
L'pliaisi du “Personnel” l'rêcompens'sait d'sa peine!!
 


Elie
 


vèrsion modèrnîsée:
 

J'avons sus not' compteux, à la Nouvelle Chronique,
Pouor qué touos les Jèrriais piêssent v'nîn les admither
Deux'trais êchantillons dé produits mangnifiques,
Tchi mouontrent qué nos fèrmièrs savent bein coumment fèrmer.
 
Y'a des concombres, j'vos l'dis, tchi sont vraînment r'mèrquabl'yes,
Ch'n'est pas l'pommé d'ma gambe tch'apprèche dé lus grôsseu,
Des patates coumme ma tête, ch'est tchiquechose d'încriyabl'ye!
Mais ch'est chein tch'i' n'y'a pas tchi m'fait l'pus mal au tchoeu.
 
***********
 
Quand j'avons des gradiles, des pommes et des tonmates,
Des frâses, des figues, des preunes, nou peut acouo s'y r'faithe...
Mais tch'est qu'un Personnel peut faithe auve des patates,
Des concombres, des pânnais, - sans aigre et sans chaûdgiéthe?
 
Si tchique vièr campagnard 'tait bouon d'aver pitchi,
Et d'apporter ichîn, un d'mié bouossé d'châtaignes,
Un caboté d'bouans mêles ou d'nouaix - ché s'sait acouo là d'tchi!
L'pliaîsi du Personnel l'rêcompens'sait d'sa peine!!

 

Viyiz étout:

 

Les Pages Jèrriaises