A Moussieu l'Editeu.
Moussieu, - Où s'avaites dit l'autre jour dans vot' gazette qué tchique bord en Angyéterre ils avaient fait craître un champignon qu'avait d'vièrs quarante pouces de conférence (ch'la veut dithe tout a l'entou jé crai). Eh bein! j'pouvons ben en faithe craître d'itèts ètou, nous, si j'voulons, et j'en ai veu que n'ou n'aithai pas couvert avec une pouque de chein qu'ils 'taient grands, et quant à les fricachi dans une cassetrole........ n'y avait pas moyen d'faithe de feu fort assez pour les cauffè sans paslè d'les fricachi! Chutte semaine en passant par la ville je vis dans un f'nêtre de boutique un gros champignon qu'emp'yait tout une carre de partie d'un but d'la f'nêtre ch'tina, je crai, f'th'ait ben la barbe à l'Ang'yais. N'ou pouvait en copé des morcyeaux comme des tranches de gras lard.
Mais j'né r'quémand'dais pas a personne d'acaté chès gros champignons là quand i' peuvent en avé d'pus p'tits car les digots ont ben miyeu goût et trouvent lus q'min ava l'gosi bein pus aisîment. Les gros s'saient sujets à stitchi dans la gorge si nou zêprouvait à l's'avalé d'une bouchie.
N'faut pas coyi l'beurre en les fricachant car j'en ai oquo un tas à vendre.
Tout à vous,
Gros Champignon
P.S. - Chès du beurre en pot d'lannée passée.
Nouvelle Chronique de Jersey 10/9/1902
Viyiz étout: