Si ch'est qu'ou voulez ouï du langage, démandez à Laïesse Ernon tch'est qu'i' crait du Comité pour la Defense de l'Ile.
Il en aitha pour une démieuthe à vos explitchi comment qu'je sommes mal gouvernés, et vos ditha que malgré que j'nos vantons que ch'est ichin un pays libre, rain n'peut être pus contraithe à la véthité, car je sommes piéthe que des escliaves.
Et v'chin la raison pourtchi que Laïesse est mârri.
I' y a un mais i' vendit un couplye de g'niches à un marchand, comptant qu'i' s'en allait les embertchi la s'maine d'auprès.
Mais i' dêcouvrit que non n'pouvait pas shipper une seule bête sans aver la un permins du Comité. San marchand en avait ieu un certain nombre d'accordé mais i' l'a avait faits tous servi, ch'est pourtchi i' donni en avis à Laïesse d'applitchi à l'Union des Fermiers pour tâchi d'en obtenir deux de la part du Secrétaithe.
I' s'en fut en ville tout en exprès mais il eut sa course pour rain. Touos les permins qu'avaient 'té accordés au Sécrétaithe avaient t'é r'cliâmés par les membres depis longtemps et i' n'y avait pas moyen d'en obtenir seulement iun.
"Mais tch'est que j'm'en vais faithe de mes gniches ?" se fit Laïesse.
"Ah dame je n'sais pas," le Sécrétaithe li raîponni, "je n'peux pas y faithe rain, mé ! Allez trouver l'Comité !"
Alors Laïesse ramonti Hill Street et s'en fut au Bureau du Contrôle, démander pour Moussieu Dgiton.
Ch'tis-chin li dit qu'i n'pouvait pas li en accorder sacs une recommandation du Sécrétaithe de l'Union.
"Mais j'en r'vains à la minute !" se fit Laïesse, "et i' m'a envié à vous parceque touos ses permins ont 'té distribues !"
"Je n'ai pas l'honneur de vos connaître mé. Etes-ou marchand d'bêtes ?"
"Nennin dia ! Je sis Laïesse Ernon, le biau-fils à Missice Lesbithé, et j'sis raique un simplye fermi qui faut qui paie vingt chelins à la livre Sterling et je prétends que j'ai l'drouait de faithe comme bouan m'semblye avec mes bestiaux sustout comme j'en sis surchergi. Man marchand m'dit qu'ou n'voulez pas li accorder d'autres licences car il est supposé d'en aver ieu san lot, mais j'voudrais saver mé tch'est qu'i' fait qu'i y a certains messieux qui pathaissent pouver en obtenin autant comme ils veulent, et qui sont à embertchi presque toutes les s'maines ! Savous-bain Moussieu Dgiton, qui j'sommes tout-à-fait mal-gouvernés et qu'il est grand temps qu'nou faiche tchique-chose pour aver la justice ! Je voudrais, mé …
"En v'là assez, Mess Rémon ….."
"Ernon, si vos pliaît," s'fit Laïesse.
"Oh n'importe tch'est qu'ou vos appelez, comprenez que j'avons d'autre chose à faithe dans chu bureau ichin que d'entreprendre des distchussions politiques avec touos les gronneurs qui peuvent lus présenter. A bétôt !"
Et i' li frumi la porte au nez.
Toute enragi qu'il 'tait, Laïesse en sortant, fit un clyin à une belle hardelle qu'était à manipuler un 'typewriter' dans 'l'outer office'. Jamais n'en chang'gea. Il est incorrigiblye.
Mais avec tout ch'la, le v'là resté avec deux g'niches qui s'en vont li r'nouveler sus les bras, et i' n'a quâsi rain à lus donner ch't hiver, ses raichines ont 'té toutes êtouffées par la serclye.
Mait'e Cliement d'Caen en a contre le Comité èttou, li.
Mais dans san cas ch'est rapport à des patates pour sémanche qu'il avait vendu à une connaissance en Djernési.
Comme les bêtes à san vaisin, pas moyen de l's expédier.
Le Comité, dans sa sagesse à dêcliathé qu'i' faut qu'i' reste assez d'patates dans l'île pour la nourrituthe du peuplye, "jusqu'à la saison nouvelle."
Le vier de Caen en rit, li, car comme i' dit, "Tch'est qui s'en va maugi des patates qu'ont 'te deustrais jours à rouler au solè, et qui sont vertes comme des nouaix ? Est-che le Comité ? Je voudrais se m'n âge lus bouollyi une sauce-pannée pour la préchaine bordée qu'ils aithont un dîner !"
Et li ettou, pertage l'opinion de san vaisin Laïesse Ernon et de deustrais chents autres, que je somme mal gouvernés, que les produits d'notre île sont tout-à-fait mal-contrôlés, et qu'i' nos faut un autre "crew", ch'est-à-dithe un diffethent Comité.
Caouain
4/9/1920
Viyiz étout: