Les Pages Jèrriaises

Sou voulez faithe Maît'e Cliément d'Caen enragi

Sou voulez faithe Maît'e Cliément d'Caen enragi, demandez-li tchi sorte d'saison qu'il a fait ch'tte annèe.

Tout chu temps il est d'une humeur de tchan !

Tout a 'té contre li dépis le c'menchement jusqu'à la fin. Il avait plianté san côti de bouanne heuthe, dans les derniers jours de Janvi et avait fait s'n idée qu'i' s'en allait foui ses patates aussi vite comme les siens de l'Etacq.

Quand son côti fut plianté, i' s'min à plianter ses clios et malgré que les vaisins disaient qu'il 'tait fo, i' ne r'arrêti pas devant que tout fusse fini.

Ses patates s'en v'naient assez bain et le bouonhomme s'en glorifiait.

La prumié chose qui l'contraryi ch'tait quand les gros messieux du Comité de l'Agritchultuthe passirent une louai qu'i' fallait que tout l'monde sprayissent lus patates.

Le bouonhomme s'était vanté qu'i' n'le f'thait pas pour personne, qu'il aimethait mus aller en prison, que d'être c'mandé sièz-li comme chenna, mais quand Wesley Mallet et Jack Arthur arrivithent siez-li, i,rentri ses côrnes un mio.

I' vouli ardgumenter avac ieux car, Maît'e Cliem est iun de cheux-là qui crait que la sprayethie est inutile et qu'ou n'fait que d'arrêter la crututhe de la patate mais les Inspecteurs n'avaient pas 'té nommés pour aller distchuter toutes sortes d'théories, lus job à ieux était de vaie que la Louai fusse observée et i' d'mandithent à Maît'e Cliem, si ch'est qu'i' s'en allait faithe comme les autres, oui ou non !

Le bouonhomme fut obligi d'céder, mais che n'tait pon sans grommâchi.

''Tch'est qu'a jamais oui pâler de sprayer des patates dans les cotils ?'' se faisait-i'.

''Jamais i' n'y a ieu d'maladie pour dithe, dans ches parages ichin !''

Mais i' sprayi quand-même, ou ch'est-à-dithe il en fit la mîne.

Laiesse Ernon, san vaisin, a tréjous deu dithe qu'il n'y avait pas grande blieue pierre dans les toubes au bouonhomme.

Mais enfin tréjous, sans domestique se promeni dans l'côti avec la machine sus san dos et la louai fut pus ou mains observée.

Heutheusement, comme le temps a fait la maladie ne s'est pon d'cliathée ch'tte année et i' n'a pon 'té nécessaithe de sprayer fort.

Mais chein qui ronge le bouon homme ch'est qu'il a défoui la maintchi trop bouanne heuthe.

Quand vint la fin d'Avri i' s'décidi qu'il 'tait grand temps de faithe venin ses Bretons et i' s'en fut à l'Union demander au Secrétaithe quand tchi que l'prumi baté s'en allait v'nin de Binic.

George li dit que le prumi départ es-sait Vendredi le treize Mai.

''Eh bain sem-n'âge !'' se fit Maît'e Cliem, ''je veux c'menchi à dêfouir mé ! Mes patates sont perdues meûthes !''

''Je m'en vais les faithes venin par St. Malo !''

Et tel en fut. Il envyi un télégramme à ses dêfouisseurs de s'en v'nin tout-d'un-coup deux frouques compliètes, ch'est-à-dithe siex personnes, lus disant de s'embertchi le Dimanche à St. Mâlo.

Le Lundi matin à chinq heuthes i' lus minrent à dêfouir, et malgré que ses patates ne faisaient qu'un cabot et d'mi la perque et n'étaient pas à la maintchi meuthes le vier de Caen capuchi d'dans tout d'même.

Quand i' passi sus l'Weighbridge avec sa prumié cherge, Jack Arthur monti sus sa vainne et examini sa marchandise.

Ou n'li pliaisait que d'sorte et i' hauchi l's êpaules.

''Oquo tchinze jours de terre ne lus aithait pas fait d'ma Maît'e Cliem !'' i' li dit.

Mess de Caen s'emporti et li dit ''Tch'est qu'ous y connaissiy vous ? V'la des patates qui sont arrêtées, grâce à vot'e maudite sprayethie !''

Le bouonhomme les passi tout d'même mait i'n'y avait qu'chenna.

Le prix n'était pas à son goût et comme d'habitude i' s'mins à endgeuler les marchands.

Mais cheux-chin qu'ont tréjous une extchuse ou un raison à avanchi quand les prix sont bas, li dirent qu'i y avait des mille tonniaux d'espagnoles sus les marchiers.

Là-dessus Maît'e Cliem se mins à crititchi le Gouvernement Angliais, disant qu'il aime tréjous mus encouothagi l'étrangi que les propres gens.

A la m'suthe que les jours se passaient le prix baissait tout l'temps et quand le bouonhomme fini de dêfouir tout chein qu'il avait pour envier le prix du 'bridge n'était que neuf chelins et d'mi l'chent.

N'ayant pus travas à donner à ses dêfouisseurs i' les mins à fauchi san fain et à bricoler sus la ferme en attendant que la s'menche fusse bouanne à dêfoui.

Par chu temps-là le prix avait r'amandé et les patates lus vendaient dépis seize à djaix-huit chelins sus l'Weighbridge mais i' fallait bain garder d'la pliante, et le bouonhomme se mordait les daights de penser qu'il fallait serrer d'la s'menche à ches prix-là.

San vaisin Laiesse Ernon, s'en glorifiaient, li.

I' n'avait pas voulu plianter d'bouanne heuthe, car i' trouvait qu'la terre était trop mouollyie.

Il avait raique quemenchi quand Mess de Caen fut fini avec le resultat qu'il dêfoui et porti san prumi viage à djaix-sept chelins, et fit jusqu'à un louis dans des jours. Il avait une récolte de sept ou huit cabots la perque et il a fait une année d'or.

S'n ''average'' est soi-disant quatre-vingt-sept louis la vergie, tandis que Maît'e Cliément d'Caen n'en a fait que vingt deux !

V'là la raison pourtchi qu'i' vaut bain mus ne pas d'mander à Maît'e Cliem tchi sorte d'saison qu'il a ieu !

Cahouain
2/7/1927
 

Viyiz étout:

 

Les Pages Jèrriaises