Des gens mal-informés s'étaient permins, la s'maine passée, de cirtchuler la rumeur que ch'tait l'Caouain qui s'en allait être nommé Recteur de Ste.-Mathie. Je voudrais, mé, que les bavards lus mêl'laient d'lus affaithes et ne lus amus'saient pas à répéter des nouvelles sans lus asseuther d'abord si sont malfondées ou non.
Mais ch'est tréjous d'même ichin, à peine i'y a-t-i' une vacance que tchique bûzard dithe en confiance à san vaisin, qu'i' sait bain, li, tch'est qui s'en va la remplyi. Si un fonctionnaithe public vaint à mouothi, il est à peine fraid que nou c'menche dêjà à distchutter tch'est qui s'sa san rempliaichant.
Chute feis, ch'est oquo djaix feis piéthe, parce que jusqu'acheteu i' n'est pas trop certain si s'en va y en aver une, une vacance.
Je n'ai pas rencontré Moussieu l'Doyen à ches dern'yi, ou bain je li 'aithais d'mandé tch'est qu'en est.
Une chose est bain seuthe tréjous, ch'est que Moussieu Balleine, de St.-Martin aut'e feis, est acheteu installé à St.-Sauveur, et nou dit que ch'est Moussieu l'Sueux d'la Trinneté qui s'en va à St.-Martin. Je connais des St.-Martinais mé, qu'aithaient aimé mus aver l'Caouain, mais nou n'a pas tréjous tout che que nou veurt sus chette terre ichin.
Conséquemment, dans l'ordre des choses i' se f'thait une vacance à la Trinneté et la rumeur a couothu que ch'tait Moussieu l'Recteur de Ste.-Mathie qui s'en allait être demandé d'aller doctriner l's âmes ès Trinnetais. Sans vouler crititchi personne en partitchulyi, i'y en a d'ieux qu'en ont grand besoin.
Eh bain, si ch'est que les choses veinnent à s'ajuster comme chenna, la probytéthe de Ste.-Mathie réstethait sans otchupant, et comme i' n'est pas probabl'ye que nous îthai haller le ministre d'une pus grande pâraisse pour le fouorrer dans une petite, il en rêsulte naturellement que le nouviau nommé s'sait mins en chèrge de l'égl'yse “qu'a cinq clochers et quatre cents (sans) cloches.”
L'affaithe est aussi cliaithe commes les problèmes de Euclid que nous apprenait à l'école.
Mais che qui n'est pas bain cliai, sus tchi que l'chouaix tchêrra?
Comme je vos ai dit pus haut, nous a mentionné le nom du Caouain, et v'là qu'a dêjà causé une certaine sensation, pas raique dans Ste.-Mathie, mais par toute l'île.
D'abord, quand nou m'en touchi tchiques patholes je m'décidi d'y donner ma pus sérieuse considéthation, mais j'ai rencontré tant d'opposition dans certains quartchèrs qui j'ai abandonné toute espéthance.
Ch'tait Marie Hibou qui fut la premiéthe à m'dêteindre ma pipe.
J'eus biau li dithe que l'probytéthe de Ste.-Mathie était une demeuthe bain pus convenable pour nous que la mansarde à Mess Bisson, qu'che s'sait bain c'mode pour mé d'être si d'amain du Mouothi, ouest que j'pourrais aller pêtchi du mulet quand je s'sais fini d'êcrithe mes sermons, et qu'ou n'aithait qu'deux pas à faithe pour aller siez Percy; jamais je n'pus la persuader.
“Tcheins-té oùest qu'tu ès!” qu'ou m'dit. “Crais-tu qu'autchune personne de bouan sens voudrait aller t'ouï prêchi, espèce d'hypocrite! C'menches par réglier ta conduite, à té-même, sans penser d'cherchi à êcliaithi des gens qui valent bain mus qu'té!”
Et ou' c'menchi à citer des passages entouor des poutres dans l's yiers à tan frèthe, et j'n'sais tchi, et comme je sentais qu'oulle 'tait à dithe pus ou mains la véthité, je m'décidi de n'perdre pas un moment mais d'êcrithe tout-d'suite à l'Evêque pour la dithe que je n'tais pus candidat.
Et pis, en outre chenna, vîtes-ous chein qui s'arrivi l'autre jour dans l's Etats?
Quand j'eu lu le résumé, “Là!” je dis à mé-même, “ch'est à cause de mé que tout chenna a 'té fait.” Le Juge Aubin aitha ouï que l'Caouain s'en va être nommé Recteur de Ste.-Mathie, et il aitha dit comme chenna “I' n'nos faut pon ch't ouaisé-là dans l's Etats, par exemplye! ch'est pourtchi je m'en vais rédigi un Projet d'Louai, mé!”
Et l'Articlye I disait que tout Recteur frais-pondu n'aithai pas drouait à l'Assembliée.
Le Député de St.-Sauveux et l'Député Cory palithent de rouoge héthan, etc., mais m'n opinion est qu'i' n'y avait pas d'rouoge héthan là-d'dans du tout. Enfin ch'tait un tas de d'vis pour rain.
Le Député d'St.-Pierre pâli contre et empêchi le Projet d'passer, et pis quand-même ch'aithait 'té la même chose, car comme je vos ai dit pus haut, je n'sis pus candidat.
Caouain
1917
Viyiz étout: