Le Chef me dit comme chenna, Jeudi matin, “Caouain, ne fait pas d'arrangements pour à saîsé, j'ai une job pour té!”
Jusqu'acheteu j'avais ieu l'habitude de frumer la boutique au Jeudi l'arlevée et de donner même un half-holiday à nos imprimeurs. Personne n'était supposé se r'trouver sus l'pont devant le Vendredi matin. Les garçons de dans l'imprimethie vont vaie le football match, Mess Pain va s'promener sur la cauchie contemplier le progrès qu'i' font avec les travaux, le chef va s'promener dans les allées de san gardin à fumer des cigarettes et à r'garder la serclye craître et mé, je passe man temps comme bouan m'semblye; généralement je sis à arrangi du bouais-à-feu pour Marie Hibou, biatchiner les bottes, nierpionner l'grès et êtchuther les coutcheaux. Mais je tchains à être libre le Jeudi au sé.
Ou pouvez don bain penser que j'tais contrarié de vaie que l'Chef avait trouvé un plian pour me donner du travas.
“Tch'est qui' y a en allant?” je li d'mandi.
“Eh bain, tu t'en vas à St. Pierre oui la piéche Jerriaise “En Cherche d'Femme,” et nos en faithe un rapport pour “Les Chroniques.”
“Tch'est que j'gagne d'êprouver ditèt?” j'li dis, “toutes les feis que j'vos ai donné un rapport d'autchune répresentation ous avez tréjous trouvé à r'dithe, dessus et ous en avez crouaîsi la maintchie. J'aimethais bain mus qu'ous îthiez vous-même, je n'sis pas adapté pour chu genre de travas-là. Les gens qui prennent part à la répresentation sont tous des amins à mé et je n'veurs pas ristchi d'les frouaîssi aver des commentaithes qui n'lus pliaithaient p't'-être pas.”
“Ne t'gènes pas d'chenna, Caouain, je liaithai tan rapport et je pas'sai man blu crayon à travers de tout ch'qu'i' y aitha d'offensif.”
Je m'en fus don à St. Pierre et à huit heuthes j'entri dans la salle.
Tchiqu'un s'êcriyi “V'chin l'Caouain!”
J'espéthe que les artistes ne l'entendirent pas. Ch'aithait 'té assez pour les ênerver.
Je n'ai pas l'toupet du Chef, mé! Quand i'va à un concert, i'va tréjous s'plianter dans les bancs de d'vant parmi la nobliéche mais me, je vais aussi driéthe que possiblye pour n'être pas trop veu.
La prumié partie du programme consistait d'chansons et d'récitations en Jerriais, le Connaîtablye de St. Louothains ouvrant la séthée avec “Vive la Compagnie.”
Savous-bain qu'i' chante oquo mus que l'Caouain? Et ch'est dêjâ dithe tchiquechose chenna.
Les récitations “Les Consolations d'une Vieille Fille,” et “La Fille d'Acheteu,” furent données à perfection et la p'tite Miss Chevalyi fut bain applaudie pour la maniéthe qu'ou' réciti “Not'e Vier Lingo!”
Quant à la piéche, “En Cherche d'Femme,” che fut un succès compliét.
Douard Pailloche et sa soeur Jane étant répresentés par Ernest Vibert et Missice Boielle, eh bain, ch'est tout dithe. Pour se servi de iune des phrases du Chef “inutile de préciser.” Lus talent est sib ain connu de touos mes lecteurs et lectrices que je n'm'en vais pas user man crayon à les servi d'un tas d'fliat'ties.
Missis Turgis (jouée si admithablyement par Missice Chevalyi) est une petite veuve qu'i' n'faut pas contrarier, par exemple!
Eprouvez à entrer siez-lyi sans essuyer bain vos pids et pis ou verrez! Jane Pailloche en pèse treis comme lyi mais ou n'peut pas li faithe peux quand-même.
Ah ça, je veurs baîlli un savon a Fred.
Ch'est un mal-poli! Quand i' va vaie Sophie tandis qu'la bouannefemme est en ville et qu'il est à passer un si bouan quart'd'heuthe avec lyi dans san parleux i'n'dev'thait pas garder san chapé sus sa tête. Si l'Caouain en avait fait autant quand i' hantait Marie Hibou, ou li aithait bain vite airaichi san couvre-sot de sus la tête.
En même temps i' faut que j'félicite l'amin Du Tot. Le mâtin a seu tchi rôle choaîsi.
J'admets bain que ch'en est p't-être pas iun trop aisi à jouer, mais tchi compensation, sapresti!
Tchille aimablye fille que Sophie!
Qu'i' me sait permins de faithe une petite suggestion à Moussieu l'Merquand.
Puisque Fred est assez achocre pour s'êmaglyi les daigts avec un marté et à s'trillyi les mains continuellement, i' finitha p't-être à s'empouaîsonner l'sang avec des fils-d'héthagnie et n'pouorra pas fidguther dans chu rôle-là.
Eh bain le Caouain est prêt à l'rempliaichi!
Dans chu cas-là i' n'y aithait qu'une précaution à prendre. I' faudrait bain souogni de n'admettre pas Marie Hibou à la réprésentation, car, au termes de Douard Pailloche, “i'y aithait des fireworks!!”
Les rôles de Joe, l'apprenti-tcherpentchi et Elise, la p'tite servante, sont p't-être un p'tit mains importants, mais ch'la n'fait d'rain, i' furent tout-à-fait bain joués par le jeune W. Sarre et Miss Le Couteur.
Joe est p't-être apprenti quant au tcherpentage mais quand ch'est pour faithe la carre à une petite servante i' n'y est pas à s'n apprentissage. Enfin, mes chiers lecteurs et lectrices, les siens d'entre vous qui n'avez pas veu la piéche “En Cherche d'Femme,” dès qu'ou s'sa produite par siez-vous ne mantchiez pas l'occasion d'aller la vaie.
Le Caouain vos asseuthe qu'ou n'le r'gret'tez pas. Ous aithez du fanne.
Caouain
1930
Viyiz étout: