Le sujet d'conversation ches jours ichin a 'té la frumethie du "Bridge" Jeudi passé et les fermiers qui dêfouithent des patates contre l's ordres du Conseil de l'Union.
I'y a certains messieux qu'ont l'habitude de v'nin distchuter ches choses-là dans notre bureau, et comme ch'la, le Caouain, qui ouait diversement cliai est gardé au couothant de tout ch'qui s'passe.
L'aut'e jour Maît'e Dan Lêcaudey se trouvait là quand Laïesse Ernon entri pour nos d'mander d'annoncer qu'il avait besoin de dêfouisseurs. "Bonjour Mess Ernon, se fit Maît'e Dan. "Est-che vrai qu'i' y eut oquo des fermiers qui dêfouithent hier malgre qu'il tait d'fendu ?"
"Ah, oui dja, à ch'qui pathait. Les noms des siens qu'ont 'té dêcouverts ont 'té postés sus l'Weighbridge et non m'a dit qu'i y en a chinq ou six.
"Eh bain ch'est d'tchi honteux !" s'fit l'bouanhomme Lêcaudey, qu'est un grand supporteux de l'Union. "Nous êprouve à lus faithe du bain par empêchi un "block" quand i' n'y a pas d'batcheaux, et tâchi d'garder l'prix des patates pour qu'i ne vainjent pas à rain comme nous a veu tchiquefais, et pis v'la du monde qui cherchent à mettre des barres dans les reues et qu'êprouvent à lus enrichi tandis qu'lus vaisins sont arrêtés ! Si j'étais à la pliaiche ès marchands je n'lus acat'tais pas lus patates, par exemplye !"
"V'là justement chein qu'i' sont à faithe aussin ! Y a une grand vainnee de quâsi chent cabots qu'a té sus l'Weighbridge dépis à matin et personne ne veur en appréchi. Le sien qui l'a apportée, quand il a veu que les marchands ne voulaient pas l'acater, a tout de suite teléphoné à san grand frèthe qui s'en est v'nu en ville à toute vitesse sus la bike et dès qu'il a veu qu'san nom était sus la liste des délinquents i' s'en est allé trouver un homme d'affaithes qui s'est rendu immédiatement auprès du Sécretaithe de l'Union et li a ordonné au nom d'san client de crouaîsi chu nom-là immédiatement. Le Sécretaithe a refusé nettement et l'autre a dit qu'i' s'en va en vaie pus long."
"J'ai ouï ettou que Maît'e Cliément d'Caen mins san monde à dêfoui hier l'arlévée, sais-tu si ch'est vrai ?"
"Eh bain j'avais ouï chenna ettou mé, mais je n'peux pas dithe pour seux car je n'le vis pas mé-même, et pis d'ailleurs, comme je sommes vaisins, j'aime mus n'dithe mot. Je sais bain qu'il a passé attou un viage diversement bouanneheuthe à matin, mais damme chenna n'me r'garde pas quand tchi qu'i' l's a dêfouies. San nom n'est pas sus la "board" tréjous."
"Ah !" dit Maît'e Dan, "si chu vier avare-la a dêfoui, i dev'thait être exposé aussi bain comme les autres ! Et j'm'en vais vos dithe une chose Laïesse Ernon, si ch'est qu'ou' l'savez, et qu'ou n'l'avez pas dênoncé, eh bain, sacrébleu ! ous êtes aussi pièthe comme li ! Et ch'est Dan Lêcaudey qui vos l'dit !"
Laïesse, li, prins tout-d'suite le paîvre au nez et s'mins à juther sus l'bouonhomme. Je n'sais pas tch'est qu'en aithait 'té si Fraînque Amin n'avait pas tè là. Mais i lus dit, "Ah ça, en v'là assez, Messieux ! N'oubliez pas qu'ou n'êtes pas dans une auberge ichin !"
A la fin i lus r'calmithent un mio et finithent par châtchi d'main ensemblye.
Caouain
15/5/1920
Viyiz étout: