Les Pages Jèrriaises

Procliasmation du Rouey des Besnis

A ses aimais, lioyaux, et fidèles sujets du Chasté Elizabeth, de l'Hermitage, du tas d'Paids, d'z Histriyiéres et de touos les roquairs autouo de la Caoûchie de St.-Heli'y.

Salut!
Oyez! Oyez!! Oyez!!!

L's Zestats de nouot petit Gerry paslent de bastir des Caoûchies et d'engaoûmer touos les roquairs qui font la forche et la sécuritai de nouotre Estat, de nouot Couronne et de vous tous mes bain-aimais, lioyaux et fidèles sujets, nobles et doctes besnis! Permettrons-je un tel empiéstement sus nos couostummes, nos priviliéges nos us, et nos drouaits? Nannin j'en jure et pon n'en mens - je nos léverons en flioquets, je deshallons nos cosnes, je nos sticqu'erons les uns contre les aoustres comme une pélotte de bra, j'nos lev'rons comme un monstre de Besnis et je protesterons contre la guerre à mort que l'Zestats veulent nos faire! Depis l'annaie sept chents neuf que Jupité et Nepteunne fondisrent nouotre Estat, nouot noble république partout ilo d'vi j'avons j'oui en paix et en sécuritai autant qui sait paussible d'y vivre ovec un tas d'pirates, et d'chorchiairs, qui vainnent au Dimanche et sus s'maine enl'ver eune partie de nouot peuple pour vendre le S'am'di au marchi - et pis nou voudrait achteu au noble et civilisai guiex-neuvième siècle erfouler nos drouaits anéantir nouos possessions, depichir nouot Couronne et nos vendre com' la ché sus léstat. Nan, pargui nan, je n'le permettrons pon - debut! en avant - Steady! Chantons:

"Es armes Citoyens
"Contre les Gerseyens
Chest un tas de crapauds
De chorchiairs et d'Quérauds
De chorchiairs et d'Quérauds. (bis)

J'avons lanchi chutte procliasmasion ichin chiers Princes, chières Princesses, chiers qu'Valiairs de l'escalle, et vous lioyaux sujets et sujettes, pour vouos dire que j'allons preparer eunne raide et stiff petition es Estats de nouotre isle de Gerry, pour lus d'mander de bastir lus Caoûchies au Bouesley (qu'est si bain r'quemendai par le bouan vier Captaine Harvey) ou à Gniermont ou en Serk, gnia pon d'soin iou pour veu qui nos leissent tranquilles siès nous, dans nouot Palais du banc du Violet, et qui respectent, en la personne de mes bain aimés Besnis, mes lioyaux sujets, comme i daivent le faire, le drouait des gens.

Si l'Zestats erjetent nouot petition j'en appellerai à la grande et piessante Reine en son Conseit ou nos rendra Justice! VIVE LA REINE! si nou z'en perdait là, j'irions à la Cour de Jupité et de Nepteunne, là j'érions du s'cours, je levrions eune armaie, j'mettrions bas les Zestats du p'tit Gerry, j'en formerions de nouviaux, je procliasmerions eune republique, j'en s'rais l'Président, je chassais touos les Crapauds, et vous chier et noble peuple ou seriez de nouot nouvel Estat, les nobles pilliairs et les acharnais souosquiens! En attendant coulous dans vouos escalles, "keep your powder dry" gardais vouos armes et vouos accoutrements en bouan estat, que vos pliaques et vos revolvers saient bain graissis et vos cosnes bain affilaies, en attendant

Jouaie et Santai
Vigueu au pistolet!

Donnai, signai et scellai en nouot Palais du banc du Violet (where stamps are not used) oprès l'av'nue es chorchiairs en Saint Cliément, la trais-chents-nonnante-doeuxième annaie de nouot règne et la onze-chents-chinquante-huiquiesme de la fondation de nouotre emprie (709.)
(Signé) PIERRE DE LA ROCQUE,
Rouey des Besnis

Vraie copie:
ABRAHAM-M. V'LICOT, E.P.G.,
Ministre de la Marinne et des Vraics.
VIVE LÉ ROUEY!!!

 

Viyiz étout:

 

Les Pages Jèrriaises