Mettez vos câsaques sus l'fôssé,
Ou pendez-les au vièr chât'nyi;
Faut profiter du bieau solé,
Et d'bouan tchoeu faut nos entr'aîdgi.
Tch'est qu'il en est si j'allons bétôt d'puther d'sueu?
I' faut s'y'attendre avec eune telle caleu.
Garçons, à la faûcil'ye!
Faites les dgèrbes mes fil'yes!
Allons, allons, touos d'raide bouan tchoeu...
J'sommes en avoût à ch't heu!
Y'a dans les chent ans, l'auteu Jèrriais, EJ Luce êcrivit ainchîn entouor l'avoût. Mais combein d'nos Grouvillais sont acouo d's avouôteurs? Dans tchique avolée, quand les finnances s'sont avrônées et l'tourisme étha 'té env'yé avaû-l'ieau, à l'av'nîn j'èrséthons avinnés à la vie du temps pâssé auve les faûcil'yes et l'travas ès clios. Si jé d'puthons d'sueu, ché s'sa à cause d'la caûff'thie globale. Et si chutte caûff'thie êtiboque des avâthies, ché s'sa les pâraisses d'ava, coumme Grouville, tchi s'sont les preunmiéthes înnondées. Nou peut aîsiement prédithe des malheurs l'avant sé, hélas!
Tout coumme, j'avons acouo tchiques avantages. Quand tout sembl'ye en avalrague, y'a tréjous un mouoyen d'avanchi en s'entr'aîdgant. Ès êlections, les pâraîssiens éthont à voter pouor les cheins tch'i' lus en vont crititchi pouor les trais ans à v'nîn: y'étha-t-i' des candidats tch'éthont un avanchement, et des Sénateurs avratchis tchi s'sont avèrtis d'sorti l'bouon avo? Les candidats lus en vont espéther un bouon avoût d'vouaix, mais ché s'sa l's êlecteurs avisés dans les cannichots tchi lus en vont décider. À la faûcil'ye, j'sommes en avoût!
Geraint Jennings
Viyiz étout: