L'Assembliée d'Jèrriais
Rêunion Mensuelle
Passant nonante membres prîntent couthage dé braver la tempéte, vendrédi, l'23 d'octobre, et lus rêuni dans la Salle Publyique dé St. Martîn, et ch'est seux qu'i' n'lus en r'grettîtent pas, car ch'fut eune raide bouanne séthée.
L'affaithes
Preunmiéth'ment l's affaithes - lé rapport dé rêunion en pliein air au mais d'juillet et l'sien d'lexcursion en Nouormandie - fudrent lius et acceptés. Deux jannes et trais grand' personnes fudrent élus comme nouvieaux members.
Annonces
Y avait plusieurs annonces d'intéthét, les souoscriptions pour les siens qui n'avaient pon acouo payé, les cartes dé Noué à vendre, et la préchaine rêunion, eune séthée par les mêssieux, prennant la forme d'un débat, 1'27 dé novembre à St. Jean.
Lé discours
Lé Député Quérée, en faithant la beinv'nue au Majeur Stamberg et sa danme, dit qué L'Assembliée 'té favorisée d'aver un Moussieu qu'avait 'té tant d'années hors I'Ile, et qu'i 'tait ervénu d'meuther en Jèrri, à nos addressi.
En rêponnant, Moussieu Stamberg, qu'avait dêjà fait d's apologies pour san Jèrriais, dit qu'i' f'thait d'san mus. Ch'tait un pliaisi d'ouï entouor sen êducation, ichin au collège, et auprès à l'Université, et pus tard dans l's Indes, dans l'armée.
Nou' dit souvent, “En tchique temps malheur est bouan”, mais ervénu en Anglyétèrre pour eune vollée, par maladie en 1934, lé Majeur, un coup mus, fut app'lé et chouaisi pour servi auve la Fanmille Rouoyale, et y restit jusqu'en 1960.
Ch'fut bein intéréssant d'ouï plusieurs anecdotes entour des expériences duthant ches 26 ans, racontées si naturell'ment, aussi bein 'taient les siennes bein pus risiblyes. Lé Majeur Stamberg est bein modeste, et n'sé vente pas d'chein qu'il a fait, mais nou' sait bein comme i' s'est distîndgi dans sa vie au Palais.
Des portraits en couleur
Pour nous Jèrriais qui ouaient souvent qué y a d'si belles pliaiches dans l'monde, nou' 'tait vraiement êmerveillis d'vaie ches portr'aits, prînts quand la Reine a visiter ches pays officiell'ment.
En Danemarque, lé bieau Palais, et un immense grand châté au bord dé la riviéthe. Pus tard au Canada, à Montréal, quand l's écliûses futent ouvertes par Sa Majesté: lé Pont International qui lyie l'Améthique avec lé Canada: en Chicago, les bâtisses d'eune chinquantaine d'êtages, ramontées jusqu'au haut par êlectricité, dans eune affaithe dé s'condes. Auprès, un pont qu'a trais miles dé long, auve des tourelles à l'souôt'nin dé 400 pids d'hauteur.
Pus tard les cascades au Niagra, et ichîn un superbe portrait prînt en hiver avec toute la glace.
Lé Taj Mahal, faut vaie pour en craithe la grandeu' et bieauté. Un palais à Udaipur, tout en blianche marbe. Les montagnes, les Himalayas, prînts dé d'dans un avion - ch'est încriyablye l'êtendue qu'i y en a sans autchunne habitation qué s'sait. Dans la ville dé Katmandu, ou-est-qu' les vaques sont laissies aller partout, car i' sont contées sacrées.
En entchi ch'tait merveilleux pour L'Assembliée dé pouver vaie chutte bieauté en couleurs si naturelles, et tous si bein explitchi pour qué tous peussent comprendre.
Ermerciêments
Lé Président ermercyit bein l'Majeur Stamberg et sa danme qui y avait aidgi ès portraits, et dit qué ch'tait un honneu pour Jèrri, qu'un Jèrriais eusse ieu tant d'responsabilité auve la Fanmille Rouayale. Des r'merciements futent accordés au Connêtablye Billot pour l'usage dé la Salle, au Conmité Social dé l'Eglyise St. Martîn pour les vaissieaux, au Conmité Social dé L'Assembliée, pour, acouo eune fais, nos aver servi dé si bouan café et des galettes. En rêponnant, Moussieu Billot dit qué L'Assembliée s'sait tréjous beinv'nue à St. Martîn.
1964
Viyiz étout: