La Rêunion Mensuelle dé l'Assembliée d'Jerriais eut lieu lé 31 d'Octobre 1997 dans la Salle Pârouaîssiale dé St Louathains a 7 heuthes du sé. Ch'tait eune séthée de Filmnes, organisés par le Conmité Sociale et fut bein întérêssante. Les Membres du Conmité portaient des chapieaux pointues avec des vèrts cheveux, à cause que ch'tait la serveille de la "Toussaint" quand touos les Sorchiers sont dèshalles.
La Strade étout 'te décorés auvec des lantèrnes en raves creûses auvec des chandelles dédans pour montré d'la lumiéthe. Y'avait même un nièr cat assis sus eune scabelle, lé tout donnant un hardi bouon êffet.
La séthée c'menchi par tous être sèrvis d'un vèrre dé cidre et des beurrés d'nièr beurre. Un bouon c'memchment pour eune bouonne séthée.
Le preûnmi filmn c'menchi par montré les gens à ramasser les pommes pour faithe lé cidre et lé nièr beurre, et pis continuit avec lé cidre à être fait à 'Morel Farm' et "Monty" le j'va à Hedley Le Ruez à écrasé les pommes. Touos les gens à p'lé les pommes et les mettre dans la pêle et pis après qué lé nièr beurre fut tchuit à lé mettre dans des pots. Tout ch'na fut montré sus l'filmn.
Un Soupé fut sèrvi à mi ch'min dé pais au fou et des pommes chuitte et d'la crême. Un r'pas bouon assez pour la Reine et j'vos garantie que tous tappitent dédans dé bouon tchoeu.
Le prechain filmn entait ieun qu'avait té fait quand l'Assembliée avaient fait du nier beurre à "Glencoe" y'a tchiques anneés. Ch'tis chein montri les membres à p'lé les pommes et à faithe lé nièr beurre quand lé Lieutenant Gouvèrneur et s'ntouorage vîntent nos visité et le Gouverneur prins son tour a rabboté. Lé sé ieu du revillion auvec les membres a chanté des vieilles chansons.
Ch 'est bein de pouvait ervais ses viers filmnes là car ch'est triste dé vais les gens tchi t'est là, mais tchin sont pus là au jour d'anniet.
Félicitâtions au Conmité Sociale pour avait d'visé eune si bouonne séthée pour nos amusé. J'éspethons que les séthées tchi suivent s'en vont être ausi bein supportés en 1997/98. J'vos soûhaite tous un Bouon Noué et Bouonne Année.
Viyiz étout: