Jeudi, l'12 dé septembre, 45 membres dé L'Assembliée d'Jèrriais pâssîtent lé jour auvec les anmîns dé L'Assembllaïe d'Guernésiais. Auprès aver fait la traversée, par baté ou par air i' fûtent rencontrés à la "Royal Hôtel" pour du café et des galettes.
Lé Président fit la beinv'nue et lé Sieur Martin donnit les détails pour la journée et n'en v'chîn court résumé:-
La preunmié visite était lé Mangni dé Sausmarez, où'est qu'les membres fûtent rencontrés par Moussieu d'Sausmarez, qui donnit un p'tit discours sus l'histouaithe du Mangni, et auprès i' fûtent alloués dé vaie la pliaiche. Y'avait un dgide dans châque appartément pour explyitchi les affaithes, portraits, meubl'ye, vaisselles, etc.
D'ichîn, eune p'tite touônnée pour Icart où'est qu'les membres pouvaient prendre eune promenade alentou pour vaie la côte.
Auprès, pour dîner au "Carlton" et les membres eûtent un hardi bouan r'pas - d'la soupe, poulet et lédgeunmes, glace et fruit et café.
I' sortitent d'ichîn dans les deux heuthes un quart, et eune autre touônnée en char-à-bancs pour faithe eune visite des sèrres au coronel Wooton, ès Rouvets. I' pâssîtent à bein près eune heuthe à vaie les difféthentes pliantes dé fliers et d'fruits. Ch'tait magnifique dé vaie coumment qu'les fruits craissent; toutes sortes - bananes, vèrjus, limons, oranges, etc.
D'ichîn, dans les quatre heuthes pour lé thée au Gouffre, qui fut hardi bein sèrvi. Lé Président, Moussieu A.C. Le Tocq, dit qu'il espéthait qu'les membres dé L'Assembliée avaient pâssé eune bouanne journée et qu'il' avaient fait d'lus mus. Lé Président, lé Connêtabl'ye W. J. Tomes, rêponnit et dit qu'il avait aimé san jour et qu'ches jours qu'i' pâssitent ensemblye font du bein ès deux Assembliées, et tous appliaudîtent ses r'mèrques.
Les char-à-bancs r'touônnîtent au baté dans les un quart dé six, et ch'tait temps dé dithe à bétôt ès anmîns et les r'mèrcier acouo eune fais pour un hardi bouan jour.
Lé baté sortit dans les siex heuthes un quart pour Jèrri en bieau solé et mé calme.
JWP 26/9/1974
Viyiz étout: