L'année 2001 es'sa eune année tout à fait spéciale pouor l'Assembliée d'Jèrriais tchi fut fondé en 1951.
Ch'est à la fîn dé ch't'année don qué j'allons mèrtchi not' chinquantième annivèrsaithe. J'éthons sans doute acouo des nouvelles à annoncer entouor ch't' êvenément pus tard dans l'année.
Mais avant chenna, j'avons, coumme tréjous, un programme d'êvenéments pouor les cheins tchi pâlent l'Jèrriais ou tchi voudraient pâler not' langue.
L'mais d'mar, j'avons l'dîner annuel à l'hôtel Ambassadeur lé vîngt quatre - n'oubliez pon d'acater vos titchets dé bouonne heuthe.
Au mais d'avri, j'avons l'sèrvice annuel tchi étha lieu lé vîngt-neu d'avri à trais heuthes dé l'arlévée, et ch't année j'allons èrtouoner à la Chapelle d'Ebenezer auprès deux'trais ans ès aut's pliaiches.
Bein seu, not' sèrvice annuel est un êvenément tch'est un mio pus séthieux, mais pouor les cheins tch'aiment un mio d'fanne, j'pouvons offri eune Séthée d'Gammes organnisée par l's êtudgiants au mais d'mai - lé vingt-chîn. S'ou n'avez janmais joué au Scrabble en Jèrriais, ous éthez p'têtre l'opportunité ichin!
Au mais d'juîn, espéthons qu'l'temps f'tha bé et qu'j'éthons tchiques brîns d'solé, pa'ce qu'lé Conmité Social s'en va organnîser eune Touônnée en Lorries. Lé monde dait s'assemblier ès Wolf's Caves lé trente dé juîn pouor un dêpart à deux heuthe dé l'arlévée. Ch'est trèjous eune êvenément bein populaithe, viyant tchi nos donne eune opportunité d'vaie des diffethentes parties dé l'île, et au même temps, nou n'a pon l'besoin d'èrgarder la route comme quand nou-s'est a cachi eune vouaituthe.
Y'étha acouo eune vîsite au mais d'juilet, quand l'Conmité Dramatique organnise not'e vîsite en France. J'éthons les détails pus tard, viyant qu'la date d'la visite peut être arrangi s'lon les mathées et l'horaithe des batchieaux. V'là un aut' jour eyou qu'i' nos faut du bieau temps, et sustout la mé pliat calme.
A la fîn du mais d'août, ch'est à nous d'rester siez nous, quand j'allons atchilyi les Dgèrnésiais. Ou savez bein qu'ch'est touos les deux ans qu'les membres dé l'Assemblliaï veinnent nos vaie, et j'espethons souhaiter la beinv'nue à eune bouonne nombre d'ieux chutte fais.
L'Annuel Général es'sa lé vîngt-huit d'septembre à la Salle Publyique dé St Martin à huit heuthes du sé. Y'etha des raffraîchissements à touos l's êvenéments qu' j'ai mentionné, sauf, comme d'raison, l'Sèrvice Annuel.
I' m' faut èrmèrcier touos les cheins tchi font tant d'travas duthant l'année auve l'organnîsâtion d' ches êvenéments-chîn: l's officièrs du Conmité Exetchutif espécialement ma vice-présidente, Enid d'Gruchy, not' segrétaithe, Geraint Jennings, lé gardgien d'nos sous, Harold P'rée, sa femme Margaret P'rée et san Conmité Social, Roy Cudlipp et l'Conmité Dramatique, et l's ètudgiants.
Et eune grande mèrcie étout à touos vous, nos membres, sans tchi i' n'y'étha pon d'Assembliée!
Tony Scott Warren
Viyiz étout: