O! qu' ch'est doux, quand nou-s'est janne,
Garçons èt filles, au cliai d'leune,
Nou n'pense qu'à s'rigalé d'fanne
Auve les connaissances qu'nou-s'aime.
I'n'y a rein d'itè comme l'amour,
Dites-en tout chein qu' ou voudrèz;
I vaut mus qué l'gros tambour
Quand nou file ès Elavèz!
Ch'n' est pas tant l'lanchon, mon doux,
Qui nos amène par ichin,
Comme ch'est l'pliaîsi, viy'ous,
Dé s'divèrti un p'tit brin!
I'n'y a rein d'itè comme l'amour,
Dites-en tout chein qu' ou voudrèz;
I vaut mus qué l'gros tambour
Quand nou file ès Elavèz!
Souos un ciel bein couvèrt d'êtailles
Fillettes sont aprivouaisies:
I font des clins, toutes chés belles,
Et n'cherchent qu'à être embrachies!
I'n'y a rein d'itè comme l'amour,
Dites-en tout chein qu' ou voudrèz;
I vaut mus qué l'gros tambour
Quand nou file ès Elavèz!
J.D.R.
St.-Héyé, Sept. 1867
|
