Les Pages Jèrriaises

L's Actes des Apôtres, Chapître 4

Vérsets 5-12

Lé préchain jour lus chefs, les Sénateurs et les êcrivains lus assemblyîtent à Jérusalem, auve Annas lé grand prêtre, Caïaphe, Jean et Alexandre et touos les cheins d'la fanmilye du grand prêtre

Ayant fait compathaître les prisonnièrs parmi ieux, i' d'mandîtent, "Par tchi pouvé ou au nom dé tchi av'-ous fait chennechîn?"

Don Pièrre, remplyi du Saint-Esprit, lus dit, "Chefs du peuplye et Sénateurs, Si j'sommes tchestchionnés aniet pouor aver fait du bein à tchitchun tchi 'tait malade à seule fîn d'saver comme tchi qu' ch't homme-là a té dgéthi. Qui sait connu par touos vous et touos les gens d'Israël qué ch't homme est d'vant vous en bouonne santé par l'nom d'Jésû-Chri dé Nazareth, qu'ou crucifyîtes et qué Dgieu souôl'vit des morts. Chu Jésû est la pièrre qué, vous les bâtisseurs, ou r'nonchîtes; v'là tch'est dévnu la clié d'la votte. N'y'a pon d'salut en autchun aut', viyant qui n'y' a pon d'aut' nom souos l'ciel donné ès hommes par tchi j'sommes pouor êt' saûvés."

 

Vèrset 11

Il est la pièrre qu'les bâtisseurs èrnonchîdrent, mais tch'est dév'nue la preunmié pièrre du bâtisse.

 

Vèrsets 32-35

Et touos les cheins tch'avaient fouai 'taient d'un même tchoeu et d'eune même âme. Et nus' dg'ieux n'dithaient qu'chein qu'il' avaient 'tait lus propriêté à ieux, mais entre ieux toute la propriêté 'tait en c'mun. Et auve bein-gn-adret d'pouvé l's apôtres têmouongnaient la rêsurrection du Seigneu Jésû. Et sus ieux y'avait bein-gn-adret d'grâce – véthe, i' n'y'avait pon d'pauvres acanté ieux, car touos les cheins tch'avaient des clios ou des maîsons les vendîtent à seule fîn d'en apporter l'prix ès pids d's apôtres. Et nou-s'êcotait s'lon les cheins tch'en avaient bésoin.

 

Viyiz étout:

 

Les Pages Jèrriaises