Et quand Pièrre vit chenna, i' dit au peupl'ye, "Hommes d'Israël, pouortchi qu'ous y'êtes ravis d'chennechîn ou pouortchi qu'ou nos r'gardez coumme chenna coumme si j'avêmes fait ch't houmme-chîn marchi par not' pouvé et not' bouonté? Lé Dgieu d'Abréhan, d'Isaac et d'Jâcob, lé Dgieu d'nos péthes, a glorifié san fis Jésû qu'ous avez mîns entre les mains d'Pilate et dênié ouaithe qu'i' fûsse pouor lé lâtchi. Mais ous avez dênié l'saint et l'juste et ous avez d'mandé qu'nou vos baillîsse un meurtriyi. Et ous avez tué l'Prînce d'la vie, mais l'Bouôn Dgieu l'a r'ssuscité des morts et j'en sommes des têmouains. Et, par la fouai à san nom, san nom a bailli d'la forche à ch'tî-chîn qu'ou viyiz et qu'ou connaîssez. Véthe, la fouai d'par li a bailli d'la forche à ch'tî-chîn pouor mannier ses gambes endrait touos vous. Et achteu, fréthes, jé sai qu'ou l'avez fait sans l'saver et vos Gouvèrneurs étout. Mais l'Bouôn Dgieu a fait arriver tout chein qu'il avait dit par la bouoche dé touos ses prophètes qué l'Christ d'vait souffri. Amendez don et changiz d'vie pouor qu'vot' mauvaîtchi sait êfachi quand l'temps tchi s'en va v'nîn s'sa v'nu d'endrait l'Seigneu."
Viyiz étout: