Les Pages Jèrriaises

Saint Matchi, Chapitre 25, vèrsets 1-13

La Parabole des dgiez Vièrges

Chu jour-là lé rouoyaume du ciel s'sa comme dgiez vièrges tchi ayant prîns lus lampes, fûtent à la rencontre du mathié. l' y'en avait chinq dé ieux tchi 'taient bêtes et chinq tchi 'taient sages. Les siennes tchi 'taient bêtes prîntent lus lampes mais né prîntent pas d'huile. Les sages, pouortant, prîntent dé l'huile en pot auve lus lampes. Lé mathié prînt longtemps à v'nîn et les vièrges d'vîntent lâssées et s'endormîtent.

À mînniet i' y'eut un grand cri "Né v'chîn l'mathié! V'nez lé rencontrer!"

Toutes les vierges sé rêvilyîtent et pathîtent lus lampes. Les vièrges tch 'avaient 'té bêtes dîtent ès sages "Donnez-nous tchiques gouttes dé vot' huile; nos lampes s'en vont s'dêteindre."

"Nannîn-dgia!" i' rêponnîtent. "I' n'y'en a pas assez pouor vous et nous. Allez pûtôt où'est qu'il' en vendent pouor en acater pouor vos-memes. »

Mais tandis qu'il' 'taient en train d'acater dé l'huile, lé mathié arrivit. Les vièrges tchi 'taient prêtes entrîtent auve li pouor fêter les neuches. Et la porte fut freunmée.

Pus tard les autres vièrges arrivîtent. "Moussieu, moussieu" i' criîtent. "Ouvrez la porte pouor nous!"

Mais i' rêponnit "J'vos dis en véthité, jé n'vos connais pas."

Restez donc tréjous sus l'tchi-vive car ou n'savez pon ni l'jour ni l'heuthe quand lé Fis dé Dgieu èrveindra.

 

La Pathabole des dgiêx vièrges

Dans chu temps-là l'rouoyaume des cieux r'sembliétha à dgiêx vièrges tchi, quand il' eûdrent prîns lus lampes, lus en fûdrent au d'vant du brûman et d'la bru. Y'en avait chînq parmi ieux tchi 'taient bêtaches et chînq tchi 'taient avisées. Les chîn bêtaches prîndrent lus lampes sans prendre dé l'hielle auve ieux. L's avisées, ieux, prîndrent des joudgies dg'hielle auve lus lampes. Coumme lé brûman 'tait r'tèrgi, i' lus accliâssîdrent, touos ieux, et lus endormîdrent. Mais d'vièrs mînniet nou briyit, "Né v'chîn l'brûman tch'arrive! Allez l'atchilyi!"

Dé siette toutes ches vièrges lus l'vîdrent et griyîdrent lus lampes. Les bêtaches dîdrent ès avisées, "Bailliz-nous d'vot' hielle, car nos lampes lus dêteingnent!"

Mais l's avisées rêponnîdrent, "Nânnîn, i' n'y'en étha pon assez pouor vous et pouor nous. Allez pus à co siez les cheins tch'en vendent, et acatez-en pouor vous-mêmes!" Et quandi qu'i' 'taient hortes à en acater, l'brûman arrivit et les cheinnes tchi 'taient grées entrîdrent acanté li ès neuches, et l'us fut freunmé. Auprès eune pause, né v'là l's aut's vièrges tch'èrvîndrent et dîdrent, "Maît, Maît, ouvre-nous l'us!"

Mais i' rêponnit, "Véthe jé vos l'dis qué jé n'vos r'connais pon." Vilyiz don, viyant qu'ou n'savez ni l'jour ni l'heuthe.
 

Viyiz étout:

 

Les Pages Jèrriaises