En ville, la vaque èrgarde l'églyise.
Tch'est qu'i' faut faithe ach'teu?
Dans lé par y'a eune veue extchise
d'la baie. Né s'sait-i' pon miyeu
dé faithe un mio dé boutiqu'sie?
Acater des fros, un chapé,
des souyièrs faîchonnabl'yes et pis
s'en aller trouver un café?
La vaque s'traûle lé long d'la grand' rue
et vait les gens et lé trafi.
Man Doue, y'a-t-i' du monde dans chu
lieu-chîn! Ou s'en va don chèrchi
la paix du mûsée oùest'qu'i' y'a
dé belles stchulptuthes du temps pâssé,
l's habits des gens, bannètes et fas,
l'histouaithe d'la ville dans les portraits.
Coumme tchi don pâsser l'arlévée?
Tchiques disques, tchiques livres, tchiques habits, tchiques
souv'nirs, tchiques cartes postales et des
gâches acatés dans les boutiques!
Geraint Jennings
|
