Cheu, cheu, don Mèrgotte, tu m'romps les bras à gaffer des goulées d'hèrbe lé long du fôssé! Si tu continnue, j'm'en vais t'saqu'ter la tête!
Quand j'nos r'tithînmes l'année pâssée, jé louînmes la tèrre dé la fèrme, mais pèrsonne né voulaient lé p'tit trais-carres ichîn au bu d'la ruette car ou n'peut pon arriver à lé labouother auvec la grande machinn'nie d'au jour d'aniet et d'même, puisqué j'voulais garder Mèrgotte pouor nos fourni du lait et m'donner un întéthêt, j'sis content dé pouver la mettre à la tèrrée dans lé p'tit bequeton si près d'la maîson. Dans l'temps dé P'pèe, i' tait labouothé mais ch'tait tout des courts-tours! I' l'touônnait auvec deux j'vaux et, quand i' pliantait, i' laîssait chîn rangs dans l'mitan qui 'taient pliantés auprès qué les courts-tours fûssent finnis. P'pèe 'tait bein èrgardant – i' n' voulait pas qué les rangs abutîssent iun dans l'autre: lé rêsultat, quand les patates lévaient, 'tait vraînment pliaisant à vaie! Ah! Tout change!
L'aut' dîner quand j'taîmes à mangi not' bolle d'soupe, man Pièrrot m'dit qu'il avait rencontré not vaisîn, lé janne Hubert d'la Haye, et qu'il avait dit qué, sus la fèrme ach'teu, i' gardaient eune septantaine dé bêtes-à-cornes. Eh bein, j'li dis, en v'là-t-i du niolîn! I' m'ergardit dé travèrs et mé d'mandit si j'voulais dithe qué Hubert 'tait menteux? Danme nou-fait, j'rêponnis, mais chein qu'il ethait deu t'dithe, ch'est qu' il' ont eune septantaine dé bêtes-SANS-cornes! Ah! Tout change!
Originna:
Cheu, cheu, don Mèrgotte, tu m'romps les bras à gaffer des goulées d'herbe lé long du fossé! Si tu continue, j'm'en vais t'saqu'ter la tête!
Viyiz étout: