Lé bouonhomme George 'tait assis su l'bord du liet, ses pids dans ses châpins et habill'yi dans sa vielle c'minse dé niet. I'faisait cliai d'leune et George sé mint à penser dé chein qu'il avait veu à ch't arlevée quand il avait 'té chèrchi la gâzette au but du c'mîn du gardin. I' y avaient tchiques années qu'il avait plianté deux bouais, iun d'chaque bord d'la héche et ch't année dans la chaleu du mais d'aout, i' 'taient en pliennes flieuthes et nou sentait lus parfum dé la maison.
Quand il s'baissi à ramâsser la gâzette, il apèrchu qué chaque bouais 'tait couvert d'au mains eune chentaine dé papillottes et d'cahuches, et quand l'aithe 'tait disteurbée, i' lus envolaient toutes ensemblyes pouor tchiques ségondes et pis i' lus 'rmettaient à chuchi lé nectar des p'tites pourpre flieuthes. I' restit là à les 'rgarder car, duthant sa vie dé septante-huit ans, i' n'avaient jamais veu eu 'té spectacl'ye! Toutes les sortes et d'couleurs dé papillottes et de p'tites grises et breunes cahuches faisant lus danse dé jouaie parmi lé parfum des flieuthes!
I' s'mint au liet et alleunmi sa lampe à côté d'li. Aussitôt qué la lueu emplyi la chambre, trais ou quatre cahuches entritent par la f'nêtre toute grande ouverte et i' lus mintent à danser partout la chambre. Souôtre ieux 'tait eune coque-souothis qui les chassait. “Valet!” cryi George en s'assievant dans l'liet et m'tant ses mains sus sa tête “les viers du temps passé avaient peux qué les coques-southis lus enhèrmélissent dans lus g'veux!” Mais George n'en avait pas et i' s'mint à rithe. D'un coup, la p'tite bête avait dispathu!
Lé bouonhomme sé l'vit du liet et i' dêcarri les pliets des ridgeaux. Là, crochtée sus lé v'lous 'tait eune p'tite pipistrelle, ses ailes env'loppées autou d'lyi! Tchi privilège d'aver veu dité! Tchi souv'nins d'un jour! George s'èrcouochi. Mais, pouor faithe seux, i' happit sa castchette qui 'tait sus l'but du liet et la mint sus sa tête! Auprès tout, avec les coques-souothis, nou n'savait janmais!
Viyiz étout: