Te souveins-tu du temps que tu m'disais,
"Je n'pouorrai jamais aimer un autre homme."
Pet-être bein que vrainment tu l'cryais;
Mais v'la qu'est passè, passè, comme un somme.
Tu m'aimais bein ou tu-en faisais la mine,
Mais la gnièt frède veint oprès le solèi:
Ch'n'est pas que j'veurs, cré mé, t'en faire un crime,
Tu n'm'aimes pus: Eh! bein! v'la qu'est parè.
Te souveins-tu du temps que pour me vée,
Me rencontrer, que tu-airais passè l'feu?
Mais il en est v'nu un autre à la veie,
Et che n'est pus la même chose achet-heu:
Il est donc vrai la femme est ainchin faite;
V'la qui li veint comme es poules à gratter:
Ch'est sa nature; Eh! bein! je te souhaite
De ne jamais avé à me r'gretter.
Te souveins-tu?..... mais qu'est qu'ch'la sert de l'dire,
D'pis qu'tu n'es pus une mie en peine de mai:
J'ai biau t'cherchi tu n'penses tai qu'à m'fire;
Tu le sais bein, chein que j'dis là est vrai.
Mais oprès tout faut-i que je sais bête ,
Comme est que j'veins à n'y avé pon songi;
I sembllerait que j'ai perdu la tête:-
Estche qu'i n'y-a pon d'aut' fille en tout Gerri.
UN ST.-LOUORENCHAlS.
|
