Mes bouonnes gens et lecteurs, comme ou savez bein, Le Congrès des Parlers Normands et Jèrriais a êprouvé dé vos apporter un tout p'tit mio du goût d'Jèrri dans les articl'yes qu'ont appathu dans la Gâzette du sé duthant les dreines années. Touos les gens qu'ont contribué à ches articl'yes-là espéthent qu'ou l's avez trouvées d'întéthêt.
Mais lé temps s'pâsse et i' faut qué j'dévons faithe un tout p'tit changement à nos articl'yes.
Auve l'aîgue et l'support dé Moussieu L'Rédacteu du JEP, Moussieu Chris Bright et Moussieu Pedley qu'est en chèrge des articl'yes tch'ont un întéthêt spécial pouor la Gâzette, Le Congrès des Parlers Normands et Jèrriais a dêcidé dé vouos présenter eune toute nouvelle série souos la même banniéthe comme "Les Parlers Normands et Jèrriais".
Ch'est not' d'si qué chenna s'en va vouos donner eune împression d'lîmportance qué la langue dé Jèrri a fait dans le dêveloppement du caractéthe des gens dé Jèrri, par exempl'ye ses expressions, lé mêlange des opinnions qu'ont, à la fîn, crée les attitudes du monde vis à vis ses vaîsîns, lé Gouvèrnément et la vie en général. Même les d'sis d'un peupl'ye qui connaît bein qué lus héthitage, réchinnes et sustout lus patrimoine restent dans la langue dé Jèrri.
En fait, la vraie langue dé l'Île reste au fond du tchoeu des Jèrriais.
Sans lus langue les Jèrriais n'existéthaient pon. Jé séthions tout à fait pèrdus!
J'espéthons qué chein tchi siéthe dans les préchaines mais es'sa d'întéthêt pouor vous.
Ch'est eune autre contribution pouor la présèrvâtion dé not'langue matèrnelle, faite auve lé support dé la Direction du JEP
JRD
Viyiz étout: