'Mais dgjablye sait', s'fit l'Ph'lip Desclios quand jé l'rencountri l'aut arlévée qui r'v'nait d'chérier du fumi sus son betchet au Haut d'l'Allée, 'dgjablye sait, té et mé , j'avouns veu je n'sais pas coumbein d'dgèrres et achteu nos v'là dans eunne autre.
'J'n'y counnais rein, dé chu Kuwait, même je n'sai pas trop bein éyou qu'chu pays là s'trouve, mais i' parait que l'pèrrot tchi l'a envahi ch'est eun vrai salaud. Tu t'ércounnais dans ches affaithes-là: dis-mé, pourtchi que j'nos en soummes mêlés?'
'Mon Ph'lip', j'lis dis, 'J'nos en soummes mêlés viyant qué chlà nos r'garde, car au jour d'aniet, tout tchi s'passe, n'importe éyou, nos t'garde et nos councerne. Je m' rappelle que quand Hitler prînt pouvé en Allemagne y-avait bein des gens dans la Grande Brétagne, en France, en Amérique, quis s' disaient qué chein tchi s'passait en Allemanage ch't'ait eunne affaithe seulement pour les Allemands et n'avait rein à faithe avec nous. Eh being té qui 'tais ichein dans l'otchupâtioun, tu sai bein tchi qu'en fut l'résultat'.
'Véthe, véthe, j'sai bein', s'fit l'Ph'lip, 'Mais après tout les Allemands én 'taient pas bein yain, i' 'taient en Europe, tout près d'nous. Mais chu gâs itchein, lé Saddam Hussein, il est bein yain, en Asie. I' n'a pas l'moyen d'nos faithe dé ma' coumme Hitler nos fit. S'loun chein qu'nous entend, y'en a qui disent que ch'n'est pas pour défendre les pouarres gens du Kuwait que j'nos soummes mînt en dgerre countre li, mais pour sauvegarder les sources éd pétrole dé d'là-bas. Tchi qu't'en crai?'
'Nou n's'tait pas hounnête', j'lis rêpounnis 'si nou' prétendait qu'les sources éd pétrole n'ount rein à y faithe. Dans la vie d'au jour d'aniet, qué ch'sait dans l'industrie, dans l'fèrmage ou n'importe tchi, nou'n'peu pas s'graie sans petrole. Mais nou' n' s'rait pas hounnête nintout s'nou' prêtendait que ch'n'est rein qu'pour la pétrole qué j'soummes en dgèrre. Té et mé, à tchiqu'chose de près, j'soummes d'eun age, nés d'vant la dgèrre dé quatorze, et j'avouns veu chein tchi s'est passé dans l'mounde dépis. En trentch'eunne les japounnais envahitent la Mandchurie, justément coumme l'Iraq veinne d'envahi l'Kuwait. La Ligue des Natiouns dé chu temps là né fit rein autre qué d'dithe ès Japounnais qu'i' n'éthaient pas deu faithe d'ité, et les Japounnais ditent à la Ligue d'aller s'faithe quatorze. Dans les counditiouns d'la politique et du pouvé dé chu temps là les autres membres d'la Ligue éthaient peut bein aisiement arrêter les Japounnais et les r'envier siez ieux. Mais la Ligue né fit rein, et dgiex ans pus tard les Japounnais 'taient à même d'entréprendre l'Amérique, la Grande Bretagne et presqu' tout l' reste du mounde, et d'nos faithe des dêgas immenses.
'Et ché ntait pas la l'tout. En tren'trais, Hitler, qui 'tait en train d'prendre lé pouvé en Allemagne, s'avisit qué l'Japoun avait envahi la Mandchurie et qué la Ligue des Natiouns n'avait rein fait pour l'empêchi. Et Hitler s'dit qué si les Japounnais avaient peu faithe d'ité',' li, i pouvait en faithe autant. Et' d'même, au c'menchment p'tit a p'tit, i' s'mînt à défier la louai internatiounale et la Ligue des Natiouns et la Ligue le laissit faithe. 'Bah, bah, se disaient les gens, 'si i' veurt réarmer l'Rhein (tchi lis 'tait d'fendu), qu'i'l' faîche, v'la tchi nos érgarde pas'. Mais vé-tu, mon Ph'lip, y'a eun vièr ditoun qué l'appetit veint en mangeant. Ayant avalé l'Rhein sans autcheun mauvais résultat, lé v'là qu'avale partie d'la Tchécoslovakie, et pis toute l'Autriche, et ché n'fut qué quand i's mînt à entammer la Pologne qué la Grande Brétagne et la France s'en mêlitent. Tu sai bein, mon Ph'lip, chein qué v'la lus couâtit. Mais si i s'én 'taient mêlés dès qu'Hitler c'mentchait ses aventuthes i'l'éthaient arrêté sans, autcheunne diffichulté, car dans chu temps-là i' n'avait pas l'pouvé de s'rangi countre ieux. Aniet, lé Saddam Hussein a bein pus d'pouvé qué Hitler n'avait en tren'trais, et Hussein s'en va nos couâter, ès Ameritchains, à nous et à nos autres alliés pour l'abattre. Mais si jé n'l'abattouns pas achteu i' d'veindrat dé pus en pus pouvant, et quand l'jour veindra qu'l' faut lis faithe fache i' nos en couât'ra autrément pus'.
'En êffet', s'fit l'Ph'lip,' 'j'crai bein, même j'sai bein qué t'as raisoun. Tout d' même, v'là tchi fait ma' au tchoeu qué tant d'jannes gens s'aient là-bas en grand dangi dé s'faithe tuer. Nou sé d'mande pourtchi qué l'Buoan Dgieu pèrmet d'ité'.
Et, buoannes gens, mé, je m'd'mande étout.
Messire Arthur De La Mare
1991
Viyiz étout: