Les Pages Jèrriaises

L'Homme qué j'sis.


"That's the sort of man I am."

Comme j'ai l'honneur d'être un Jèrrhiais
Eth qu'j'baille d'ma goule t'chique fëis en patoiës,
D'vos amusé j'vais êprouvé
J'vais faithe d'men mus, j'peux pas faithe pus,
Bein content j'sis d'vos vëis m's'amis,
V'là la sor-té d'homme qué j'sis.

J'sis yieun des p'tits: comme ou viyis
J'peux pas qu'is faithe - j'sis fi's d'men pèithe,
J'sis pas bein haut: ni même bein gros
Mais couôte qui couôte ch'est pas ma faute,
J'sis yieun des p'tits: comme ou viyis
V'là la sor-té d'homme qué j'sis.

Quand j'sis marrhi : j'sis pas content,
Mais v'là t'chi n'arrive pas souvent,
Eth quand j'sis calme j'sis pas êmu,
Ni sus men dos, quand j'sis sus but
Eth quand j'sis d'but, j'sis pas assis
V'là la sor-té d'homme qué j'sis.

Quand j'ai la goutte j'ai'n'bé pas d'bièthe,
Car entre nous v'là t'chi m'faith pièthe,
Mais quand j'ai sé j'vais beithe une fëis
Eth t'chique fëis; une fëis - deus trëis fëis
Mais: j'sis tréjous sobre, janmais j'sis "gris,"
V'là la sor-té d'homme qué j'sis.

Même en êtèh : j'sis jamais "caud,"
Ah ! pas pus caud q'un vièrrh crapaud,
Pis si par malheur en Hivé
J'ai t'chique fëis l'ouëizé à rouoge bé,
J'lus dit qué men nèzh a l'ong'hlie
V'là la sor-té d'homme qué j'sis.

J'ain'n'n'raque pas quand j'sis évilli,
Eth j'ain'n pieûthe pas quand j'ai du gi,
J'sis pas à tèrrh, quand j'sis en mé,
Ni en Motor Car, quand j'vais à pied,
Eth j'aime mus l's'h'îtres qué les beinnis
V'là la sor-té d'homme qué j'sis.

J'sis pa' bein caud, quand j'sis m'yié g'lèh,
Ni g'lèh quand y faith caud soléh,
J'vais pas ès ormèrrhs la mé haute,
Ni au cresson lé long d'la côte
J'sis pas si bête, j'ai pus d'avis
V'là la sor-té d'homme qué j'sis.

Y'a pus d'vingt ans qué j'ain'n'm'râze pas
Car j'trouvais qu'tchait trop d'embarras,
Pis quand j'm'râzais j'm'copais l'moton,
Mais j'n'm'cope pus, car j'n'm'râze pon
Eth des barbiérrhs j'm'fiche ou viyis
V'là la sor-té d'homme qué j'sis.

Quand j'tais garçon j'allais m'prom'né
A vais "Nancy" t'chique fëis au sé,
Car j'tais pas vié, quand j'étais jeune,
Dans chu temps là j'avais du "fun"
Ach'teu qu'j'sis vié j'sis pus rassis
V'là la sor-té d'homme qué j'sis.

D'pis quarante ans j'ain'n'pâle qu'Angliais,
Mais j'aime tout d'même à ouï l'Jèrrhiais,
Eth j'espeithe bein d'ain'n'jamais vais
La mort dé notre bouan vièrrh patoiës
Car Jêrrhiais j'sis d'la tête és pids
V'là la sor-té d'homme qué j'sis.

Bouan Noué, êth qu'la Nouvelle Annêh
Sait bein miyieuthe qué les passêhs,
Eth comme d'gniolin, n'en v'là assêzh
J'vos souohaith à tous mes viêrrhs amis
Santéh; tout bonheur: èth longue vie
V'là la sor-té d'homme qué j'sis.

1900.

Ch'la S'Peut

 

Viyiz étout:

 

Les Pages Jèrriaises