Nou sait bein qu'la lînmite dé vitesse en Jèrri est d'quarante milles à l'heuthe, mais la lînmite est baîssie dans les rues êtraites où'est qu'i' y'a des maîsons. J'avons étout nos Vèrts Quémîns auve eune lînmite dé tchînze milles à l'heuthe où'est qu'la priorité est ès piêtons, ès cyclistes et ès j'vaux.
J'avons un amas d'vaituthes et d'boulants au jour d'aniet, et ch'est bein seu, mais tch'est qu'nou-s'en va faithe quand i' n'restétha pus d'pétrole? Y'étha-t-i' assez d'boulants êlectriques ou à hydrogène pouor qué l'monde piêsse cachi d'la manniéthe à tchi qu'nou-s'a 'té accouôteunmé?
Né v'chîn la tchestchion: s'sa-t-i' nécessaithe d'èrvénîn au temps quand nou cachait des vainnes et des hèrnais par les c'mîns? Lé trafi ithait pus douochement, valet, car nou dit qu'un j'va va au pas à eune vitesse dé siêx milles à l'heuthe. Né v'là tch'est cèrtainement assez dans les Vèrts Quémîns.
Mais pouor l'Av'nue Victoria? Bein, pouor haler les boulants d'l'av'nîn i' nos faudrait d's annimaux assez vites pouor satisfaithe les cacheurs Jèrriais. Tch'est qu'nou dithait des girafes? I' couothent à trente-deux milles à l'heuthe, mais ch'n'es'sait pon aîsi d'les partchi dans les bâtisses à stâtionner. Les chèrs du Nord ont la même ièrre, mais Papa Noué s'sait trop jaloux.
L's autruches né volent pon, bein seu, mais i' couothent bein quédaine, jusqu'à quarante milles à l'heuthe. Nos cacheurs pouôrraient don rester dans la lînmite dé vitesse, tout en s'litchant les babinnes à l'idée dé hardi grands oeufs fricachis.
L's aûnièrs dé Porsches aim'thaient mus, ieux, des boulants auve des guépards entre les limons. Ches grands cats vont sept noeuds dans la bliâse - jusqu'à septante milles à l'heuthe - mais comme lé bouôn vièr diton nos ramémouaithe: tant pus d'prêsse, tant pus d'abus!
Geraint Jennings
Viyiz étout: