J'vantons assez nos louées, nos couôtumes et nos us,
Et touos les bouans Jerrias veulent faithe coumme lus grand'pèthes,
Si nou n'sait pon faithe mus, au mains n'ou n'fait pon pliaithe,
Nou tâche, autant qu'nou peut, de joindre les deux buts
Et de n'se trouver pon trop vite souos ses affaithes.
J'avons, un chatchun l'sait, enrachinèe en nous,
L'amour de notr' pays et d'ses institutions,
Nou nos l'a dit chent fais (dans l'temps des êlections)
Et verre à vin en main je l'témoignons tréjous
Quand les "bouans serviteurs" rendent compte de lus gestions.
Mais parmi nos usages y'en a y'un sans patheil,
(Je l'di sans l'mains du monde penser que j'soummes coupabl'yes
D'excès de gourmandise - de tchi qu'est detestab'lye):
Ch'est d'aver d'temps en temps, bein servi en hôtel,
Un raidde bouan p'tit dîner, ov du vin sus la tabl'ye.
Je r'mertchais, par exempl'ye, en liêsant ma gâzette,
Quand l'porteux m'l'eut dounnèe, en passant, Mêcredi,
Qu'dans l'cas des "show" d'pâraisse, quand l'travâs est fini,
Pour que la journée s'sait bein en rêgl'ye et compl'yète,
Il faut qu'y y'ait tout d'même "un dîner bien servi".
Et tandis qu'les fermièrs, qui n'ont autchune bieauté!
S'empl'yent d'soupe de tortue, d'poulet, d'ragoûts, d'turbot,
Et viéddent lus verre et l'rempl'yent et l'viéddent et l'rempl'yent occouo.
Les g'niches qu'ont d'si bouans points et qu'ont tant méthité,
Ne trouvent souos lus mûsé qu'la maintchi d'un fagot!
Elie
|
