J'avons l'habitude d'vos envyer tuous l's'ans, un telegramme quand vot' Société est en fête le 14 Octobre, mais ch'tte annaiée i' pathaît qu'not' Président s'en va diner avec vot' Société, ch'est pour chi i' peut tout aussi bain vos apporter li maîme les buons sou'aits de tuous nos membres pour vot' santé, et pour la santé de Madame Le Chaîne, de vot' famille et d'lus p'tiots.
J'espethons que vot' Société itha tréjous comme sus ruollettes, et que tuous les Jerriais à Londres, surtout les jeunes Jerriais et Jerriaises (Ah qui sont jolies!) ne manqthont pas de deveni' membres.
J'avons veu ettou, avec biaucoup d'p'iaisi que Mousieu Le Boutillier (qui s'appelle Butler en ang'iais) et qu'est Le Grand Trésori de l'Angleterre, s'a au diné. Chose seuthe qu'i dait être de la buounne vi'elle rachine Jerriaise.
Si à la fin d'sa gession i's'décide de s'retabli' dans eunne des Paresses d'ses Anchêtres, que che sait à St. Brelade (où es' que les Le Boutilliers étaient des juges de la Cour Royale) où à St. Ouen (où es' que les Le Boutilliers passent lus temps à elever des bêtes à cornes qui n's'vendent jamais mains de Mille Livres Sterling par tête) i's'a r'chu a bras ouverts !
Ocuo une fais: Nos sou'aits pour vot' buonne santé, pour la prospethité de vot' Société, et pour un raide buon frico Mardi !
Octobre 1952
Viyiz étout: