à Portinfé,
Saint Ou.
Moussieu l'Editeu,
Eh bein, les deux êlections à Saint Louothains et Saint Mathie ont 'té décidées, et comme j'avais prédit, le perdant à Saint Louothains était l'Sieur Rémon, et à Sainte Mathie lé Sieur [...] J'éthais creu que l'Sieur Rémon éthait yeu pûs d'vouaix, mais par chein qu'nou m'a dit, chein tchi li fit grand tort et li perdit s'n êlection ch'tait san [...] lá séthée d'la nominâtions. I' s'faisait trop seux que l's [...] lé supportéthaient, et [...] à ch'teu j'pense bein tch'i' n'comprend pas pourtchi qu'i' n'fit [...] mûs. Comme ou l'savez, sans [...] i' faudra une autre êlection [...] pour un traisième Chantgni, et nou m'a dit que l'Sieur Rémon s'en va se r'mettre sûs les rangs, [...] m'n înformâtion est [...] y'étha d'l'oppôsition, et je n's'sais pas un mio surprint si [...] de chu traisième Chantgni [...] Emmanuel et pas Rémon, [...] chenna en p'tit d'temps, mais [...] gagi j'sais bein sûs tchi candidat que j'mett'rais mes sous, La Merrienne eut la chance [...] cherchie et rapportée de Saint Louothains, et quand ou [...] Moussieu, j'eus yunne des grandes surprinses d'ma vie.
J'arrivis siez-mé une bouonne d'mie heuthe devant li, ayant print bouon soin de m'garder sôbre, ou quâsi. J'n'avais autchune doute que j'pouôrrais ramonter les d'grès pour mé couochi, et si la Merrienne n'avait pas print la clié d'l'armouaithe, i' s'peut que j'éthais avalé un p'tit lèrmin, car j'avais ocquo grand sé, mais comme j'étais à tachi d'dêcouvri tchique manièthe d'ouvri l'armouaithe, j'entendis l'brit d'un moteur dans l'bel. Tchiques minutes après, né v'là la Merrienne tch'i' s'présente dans la tchuisine, et j'vis tout-d'suite qu'oulle avait bu tchiquechose pûs fort que du tais. Ou marchait ocquo assez draite, mais san visage était rouoge, et j'avais d'la peine à comprendre chein qu'ou voulait dithe. Ou dit tchiquechose de ses nombreux couôsîns, qu'oulle avait embréchi l'Chantgni Louothains, et qu'oulle avait yeu yunne des belles séthées d'sa vie. Pour en fini, Moussieu, j'eus à li aidgi à ramonter les d'grès, et j'éthais méme voulu la deshabillyi, mais quand j'eus hallé ses cauches, ou m'fliantchit une paffe, s'assit sûs l'plianchais, et m'fit sorti d'la chambre tandis qu'ou s'dêfaisait dé chein qu'oulle avait sûs l'co. Lé matin oulle avait grand ma à la tête, et presque tout l'jour ou s'était trouvée malade et restit au liet, mais quand vînt l'heuthe du tais ou sé ravigottit et descendit, s'trouvant bein mûs. Mais, j'crais, Moussieu, qu'ou s'sa longtemps d'vant vouler aller à une autre êlection à Saint Louothains!
Quant à mé j'm'en fus à Sainte Mathie à pid, mais j'fus rapporté par un vièr amin, tchi m'dit que n'voulant pas offenser autchun des candidats, il avait voté pour les trais! J'ai tréjous dit, Moussieu, que y'a d'bein drôle dé monde dans la P'tite Pâraisse.
Dans la séthée j'nos mimes à pâsler du Bailli, et d'la grande nouvelle que nou-s-avait entendu à s'n êgard. La Merrienne voulit saver tchi difféthence que chonna s'en allait li faithe, mais j'li dis que je n'savais pas exactement, mais tchi fallait espéther tch'i' vivrait ocquo bein d's années pour jouï d'sa grande pôsition. Epis j'dis à la bouonnefemme que de toutes les bêtises que j'avais fait dans ma vie, la pûs grande ch'tait de n'aver pas print l'avis d'man maître d'êcole quand j'tchittis.
“Tu sais, Merrienne,” j'li dis, “si j'avais yeu un mio d'bouon sens, j'm'en s'sais allé dans l'office d'un Ecrivain. J'éthais apprint comment qu'un homme d'affaithes dans chu temps-là pouvait faithe des sous à bouon marchi et pouvait s'enrichi sans autchune diffitchulté. Et, pûs qu'probablye, j'éthais fini par être Lieutenant-Bailli, et finalement Bailli. Pûs tard, j'éthais 'té honoré par la Reine Victoria, et je s'sais dév'nu lé Baron Ph'lip dé Portinfé, dans la pâraisse d'Saint Ou, Ile de Jersey.
“Et,” j'continuis, “j'éthais sans doute yeu une couronne, avec des diamants et des rubis, et j'éthais visité avec lé Gouverneux et toute l'élite de l'Ile, et quand j'éthais yeu à m'n'aller d'l'autre-bord, j'éthais yeu un tombé vingt pids d'haut dans l'chim'tièthe, une blianche robe et une harpe d'or et un siège rêservé pour les Barons, les Ducs et tout l'restant.”
“Un bieau réve,” s'fit la Merrienne, “mais ta femme, tchesque oulle éthait fait dans l'couothant d'sa vie, et après? Tu m'en as pas dit un mot. Sans doute, oulle éthait yeu une couronne étout, un grand tombé dans l'chim'tièthe, et une blianche robe. Et tes êfans?
Je m'grattis la tête là- d'sûs, Moussieu, car dans man rève, j'n'avais pensé ni à femme ou êfans, et, après tchiques minutes, j'en dis autant à la Merrienne, tch'i' n'pathut pas trop contente et voulit qu'menchi à me faithe des r'proches.
“Mais, Merrienne,” j'li dis, “à qu'menchi il est pôssiblye que j'éthais resté vièr garçon, et j'n'éthais pas peut aver d'mousses si j'n'avais pas 'té mathié.”
“Ne m'conte pas chu gniolîn-là,” ou s'fit. “Un homme comme té n'reste pas souvent vièr garçon, mais chonna n'veur pas dithe tch'i' n'aime pas les femmes, ni que n'y a pas d'mousses ichin et là tch'i' li r'semblent. J'en ai veu assez d'chonna ichin à Saint Ou dans man temps, sans aller pûs lien, et j'n'ithais pas bein lien au jour d'agniet sans en trouver ocquo d'la sorte. Tu m'as dit té-même pûs d'une fais que la natuthe humaine né change pas.”
“Ecoute, Merrienne,” j'li dis, “tu ès d'une bein drôle d'humeur à ces seit. V'là tchi n'te fait pas bein d'aller ès êlections, et d'embréchi des Chantgnièrs. La préchaine fais, ma vielle, j'ithons ensemblye.”
“N'te gène pas,” ou dit, en sé l'vant pour prépather un mio d'soupé. “I' n'y étha pas d'préchaine fais!”
Ph'lip
1961
Viyiz étout: