Viyiz étout:
Au Portinfé,
Jeudi-au-sé.
Moussieu l'Editeu,
Hier au sé, la Merrienne, ayant print bétôt une heuthe à lièthe la gâzette, m'la pâssit, et j'en eut pour une pôse étout, ch'estentchi y tait un mio tard quand j'nos mîmes à considéthé chein tch'avait tait dit et chein tch'avait tait fait dans la Chambre le jour de d'vant.
Comme de couôtume ch'fut lyi tchi qu'menchi. “Ch'est bein pliaisant, Ph'lip,” ou s'fit, “d'savé que j'avons dans l's'Etats un membre tch'est contre la béthie. As-tu veu que l'Sénateur J. J. voulit savé si ch'tait vrai que deux policemans avaient tait trouvés souos l'influence de la bouësson et, si ch'tait la véthité tchi punition tch'ils avaient yeu?”
“Oui,” j'l'y dit, “et j'ai liu étout que l'Président d'la D'Fense, le Sénateur Troy, l'y donnit en avis de s'mêlé d'ses affaithes, ou aussi bouon. Je n'le comprends pas, le Jack Le Merquand. Y n'tait pas si partitchulyi une certaine séthée d'êléction quand aupi d'la salle parouîssiale et dans la route y y'avait une tappée d'nos braves êlécteurs tch'avaient bein d'la peine à lûs t'nin d'but. Et tchèsqu'avait péyi pour le béthe?”
“Jamais je n'craithai que ch'tait l'y,” ou raiponnit. “Il a pûs d'principe que chonna.”
“J'n'ai pas suggéthé tch'y péyit pour une goutte,” j'l'y dit, “mais avec chonna j'voudrais savé pourtchi tch'y crut que ch'tait san d'vé de souosl'vé la tchéstchon de chais deux membres d'la police salariée. Ach'teu, Merrienne, approuve-tu d'la limîte de quarante milles à l'heuthe pour les môteurs?”
“Mais je crais qu'j'en approuve,” ou s'fit, “sinon si ch'avait tait mé j'éthais fixé une limîte de djais milles au tout pûs. V'là tchi donn'nait pûs d'chance à une vieille femme comme mé de crouaisi la route sans autchun dangi d'être êgliamie par yunne de chais fichues machines. La chose est qu'à quarante milles à l'heuthe un môteur peut vos mettre souos les mérgots tout aussi bein comme s'il avait tait cachi à chent milles. Mais chein que j'voudrais savé ch'est comment qu'la police pouôrra enforchi chutte louai-là, viyant que l'êvidence d'une seule pérsonne ne s'sa pas assez pour asseûthé une conviction. Mais j'pense bein qu'un Chantgni, un Officyi d'Connêtablye ou un policeman n'éthont autchune objéction à un mio d'cotillion pour lûs gardé compagnie quand y f'tha fraid.”
J'l'y dit que je n'criyais pas que l'Juge d'Instruction approuv'thait d'chutte manoeuvre-là.
“P't'être bein,” ou dit, “car le pouore homme n'est pas mathié, et nous dit tch'y n'aime pas les femmes pûs qu'chonna. Mais j'ai veu dans la gâzétte, Ph'lip, qu'un certain Député Dupré eut hardi à dithe. Tchèsqu'il est, chu Député?”
“Je n'sais pas trop,” j'l'y dit, “mais au mains il a un bouon nom Jêrriais, et ch'est tréjous tchiquechose.”
“Ch'est hardi,” ou s'accordit, “mais y m'semblye tch'il est trop dêpenseux.”
“Ch'n'est pas tout-à-fait d'sa faute,” j'l'y dit. “Y rempliéche le Sénateur Krichefski et sans doute à apprint sa léçon.”
“Sais-tu bein, Ph'lip,” ou dit, “j's'y v'nue à pensé que si touos chais orateurs dans l's'Etats 'taient d'bouons Méthodistes, nou pouôrrait en faithe des prédicateurs locaux tch'y rempliethaient nos chapélles.”
“Nou ne r'veindrais jamais siez-sé en temps pour dîné,” j'l'y dit, “et au sé toutes les aubérges s'saient freummées quand nou sortithait.”
“Une raide bouonne chose,” ou s'fit. “Si j'en avait l'pouvé, y n'ouvrithaient pas du tout. Mais Ph'lip, j'ai liut tchique chose tchi m'a faite vraiement mârri. Tu'as veu, sans doute, que chu Député Venables voudrait aboli notre vier système de police honorifique. Est-y fo?”
“Grand doux, nanin, Merrienne, y n'est pas fo,” j'l'y dit, “mais y s'trompe hardi s'y crait qu'nos campagnards s'en vont faithe chutte bêtise-là. En Ville che s'sait sans doute une bouonne chose, l'changement pouôrrait v'nin pûs vite que nou n'crait, mais ailleurs, nouffé, pas dans notre vivant tréjous. Le vier système tcheint ocquo bon. D'mande au John Baudains, d'Saint-Louothains, au Sieur Ahyi, le Connêtablye de Saint-Martin, ou à notre Député, le mâjeur de Gruchy, s'y veulent le vais dispathaître et tu séthas bein vite tchèsqu'ils en craient.”
Après chonna, Moussieu, j'eûmes un mio d'soupé et j'nos couochîmes, mais assez drôlement, car prèsque tréjous j'm'endors tout-d'suite, mais j'réstit êvillyi pour une bouonne dém'ieuthe, et l'idée m'vint qu'à quarante milles à l'heuthe, dans nos ruéttes, y'éthait pûs d'accidents qu'jamais et les piêtons, sans pâslé des tchans et des câts, s'sont pûs en dangi qu'jamais. La Merrienne a l'habitude d'allé s'prom'né ichin et là prèsque toutes les arlevées, et je n'sais pas si j'dév'thais l'enfreumé dans sa chambre ou m'fié sûs la Providence qu'ou ne s'sa pas ram'née tchique jour une djobbe pour l'entrepreneux. Tchèsqu'ou en dites, Moussieu?
Ph'lip
1959