Moussieu l'Editeu,
J'ai grand r'gret d'vos dithe que tout n'a pas tait bein siez nous chais jours, et j'm'en vais vos en dithe la cause.
Ch'n'est pas les tempêtes que j'avons yeu; ch'n'est pas qu'mes bricolis sont pliens de chais fichues carpilleuses; ch'n'est pas qu'mes bricoles de vaques mangent pûs et donnent mains d'lait que jamais; ch'n'est pas même la léttre que j'ai r'chu du gérant d'ma banque; nan, Moussieu, ch'n'est pas chonna, mais tchiquechose bein pièthe. En un mot, ch'est la Merrienne et la maudite gâzétte qu'ou liét d'un but à l'autre touos les siers.
J'pense bein que j'n'ai pas besoin d'vos dithe que ch'est le rapport des Etats tchi l'ont faite si roupilleuse qu'ou n'sait pas à maintchi du temps tchèsqu'oulle est à faithe. Hier ch'tait du shucre dans la soupe, et du sé dans l'tais; agniet oulle a lanchi un co-d'pid à la pouôre catte tch'est, comme de couôtume, en famille, et pour agvé tout, quand j'ai entré à douze heuthes pour man dîné, ou m'a dit qu'ou n'avait pas yeu l'tchoeu de l'prépathé, mais qu'ou criyait que j'trouv'thais un mio d'fromage et une crôte de pain dans l'armouaithe.
Mais, Moussieu, la faim que j'avais m'donnit le couothage d'un St. Ouennais, et sûs chonna j'me r'dréchit, et j'l'y d'mandit tout net et carré tchèsqu'oulle avait, “Parsque,” j'ajouôtit, “ne v'là deux jours que tu m'traite comme un tchan, et je n'm'en vais pas enduthé chonna pûs longtemps.” Et, happant l'fromage et la crôte de pain, j'les fliantchit dans l'âtre.
Ou me r'gardit fixement pour tchiques instants, épis: “J'éthais creu, Ph'lip, que tu'éthais seu tchèsqu'y m'a fait tant mârri. Tu'as liut, comme mé, les rapports dans la gâzétte de chein qu'l's'Etats ont fait chutte semaine?”
“Vèthe,” j'l'y dit, “mais je n'peux pas vais que chais rapports dév'thaient m'donné un ventre viède.”
“Eh bein, quant à mé,” ou dit, “ne v'là deux jours que j'n'ai pas mangi, sinon pour un mio d'pain rôti pour man dêjeuné, et une beûrrais pour man tais. J'n'éthais jamais creu, Ph'lip, que j'vêrrais l'jour quand y n'y'éthait pas pûs d'chinq bouons Jêrriais dans l's'Etats.”
J'eut à rithe, Moussieu, mais ou m'dit que si je n'l'êcoutais pas sérieusement ou s'taithait.
“Nouffé, Merrienne,” j'l'y dit, “mais tchèsqu'y sont chais chinq bouons Jêrriais?”
“Si tu'avais liut ta gâzétte,” ou dit, “tu n'éthais pas yeu à d'mandé. Tu'éthais veu que quand notre Député le Mâjeur de Gruchy d'mandit pour l'appél nominal sûs la tchéstchon de donné pûs d'pouvé au Chef d'la Police Salariée, les seuls tch'y 'taient d'san bord 'taient l'Sénateur John Le Mérquand et les trais membres de Saint-Cliément.”
“Oh, j'vit bein chonna,” j'l'y dit, “et est-che pour chutte raison tch'y sont les seuls vrais Jêrriais dans l'Assembliée?”
“Oui,” ou dit, “et si j'en avais l'pouvé j'lûs donn'nais à châtchun une médaille. Le membre tch'y m'êtonne, ch'est l'Henri Ahyi, d'Saint-Martin, épis étout notre Connêtablye. Le Mâjeur avait dit que toute la pâraisse 'tait contre la Police Salariée.”
“Vèthe,” j'l'y dit, “et y s'trompait grandement et pas pour la preumié fais. Quant au Sénateur John Le Mérquand, je n'le comprends pas du-tout. Y pâsle à vos engnié, mais l'Assembliée n'en tcheint pas d'compte comme oulle éthait fait y'a tchiques années. Ch'est sans doute un bouon Jêrriais, mais y n'prend pas en considéthâtion que les temps sont changis, et que chein tch'était bouon pour nos anchêtres ne peut pas faithe ach'teu. Je n'te dis pas que j'approuve de tout chein qu'à 'tait fait dans l's'Etats chutte s'maine, mais y'a yeu du bouon parmi l'mauvais. Par éxemplye, ch'tait injuste et riditchule que l'Chef d'la Police Salariée n'avait pas autant d'pouvé dans la Campagne comme yun d'ses hommes. Chein tchi m'surprend, ch'est tch'y s'est soumint si longtemps ès conditions attachies à sa djobbe.”
“Mais, Merrienne,” j'l'y dit, pour en fini, “tu vêrras que si ach'teu, les membres de la police honoraire et l's'hommes en uniforme se décident de travaillyi ensemblye, que notre vier système réstetha ferme et solide pour bein d's'années.”
“Oh bein,” ou s'fit, “faut l'éspethé, mais quant à mé, j'en doute.”
Ph'lip
1959
Viyiz étout: